ტყიბულში სტიქიის ზონაში მეწყრული პროცესების შესასწავლად გეოლოგების დამატებითი ჯგუფები ჩავიდა. სპეციალისტების პირველადი დასკვნა სავარაუდოდ, დღესვე გახდება ცნობილი. სოფელ კურსებში მეწყერი კვლავ აქტიურია.
ბოლო მონაცემებით, ბეროძეების და გოგოლაშვილების უბანში 10 სახლია დაზიანებული. ტერიტორია კონტროლდება მეხანძრე-მაშველების მიერ. ადგილობრივი ხელისუფლება მოსახლეობას მოუწოდებს დაემორჩილონ სამართალდამცველების მითითებებს, რადგან როგორც ტყიბულის მერი ამბობს, დაფიქსირდა მოსახლეობის მხრიდან სტიქიის ზონაში შესვლის მცდელობა.
„მეწყრული პროცესები აქტიურია სტიქიის ზონაში. დაემატა გეოლოგებს სპეციალისტები და დამატებითი ჯგუფები ადგილზე იკვლევენ პროცესებს. შექმნილია საგანგებო შტაბი, რომელიც 24 საათის განმავლობაში მუშაობს“, – განაცხადა ტყიბულის მუნიციპალიტეტის მერმა, დავით კუბლაშვილმა.
როგორც ცნობილია, სოფელში მეწყერი 58 ჰექტარი ფართობის ტერიტორიაზე განვითარდა. სოფელ კურსებიდან ორი დღის წინ განვითარებული მეწყრული პროცესების შედეგად, 45 ოჯახის, დაახლოებით 106 ადამიანის ევაკუაცია განხორციელდა.