რადიო თავისუფლების ცნობით, საქართველოში იმყოფებოდა დაღესტნის სამუფთოს თავმჯდომარე, რომელიც უკრაინაში ომის მხარდამჭერია. მედია წერს, რომ ამის შესახებ მურად ისმაილოვმა თავის Telegram-ის არხზე დაწერა. ისმაილოვს პირადად შეხვდა აღმოსავლეთ საქართველოს მუფთი, ეტიბარ ემინოვი.
“გულწრფელად გიხდით მადლობას თბილი მიღებისთვის, ყურადღებისთვის და ძმური ურთიერთობისთვის“ – დაწერა ისმაილოვმა.
ამ ეტაპზე უცნობია, კიდევ ვის შეხვდა დაღესტნის სამუფთოს წარმომადგენელი. მურად ისმაილოვი დაღესტნის სამუფთოს თავმჯდომარედ მიმდინარე წლის იანვარში დაინიშნა. მანამდე ის მუფთის მოადგილის თანამდებობას იკავებდა.
დანიშვნამდე ერთი დღით ადრე ისმაილოვი დაესწრო დაღესტნის რესპუბლიკის როსგვარდიის დირექტორატის სპეციალური დანიშნულების რაზმის ჯარისკაცების გაცილების ცერემონიას.
“მან სამშობლოს საზღვრებისა და უსაფრთხოების დაცვისთვის სამსახურის მნიშვნელობას გაუსვა ხაზი და ამას დიდი პასუხისმგებლობა და გამოწვევა უწოდა“ – ნათქვამი იყო განცხადებაში.
დანიშვნისთანავე ისმაილოვი რუსეთის მიერ ანექსირებულ უკრაინის ტერიტორიებზე გაემგზავრა „ჰუმანიტარული დახმარების მორიგი ტვირთით“. ამასთან, მან უკრაინაში მებრძოლი „კასპიის“ მოხალისეთა ბატალიონიც მოინახულა.