ევროპარლამენტში დღეს საქართველოში არსებული ვითარების შესახებ დებატები გაიმართება. “ელენე ხოშტარიას საქმე და ქართული ოცნების რეჟიმის პოლიტიკური პატიმრები” – ასე ჰქვია დებატებს, სადაც ევროპარლამენტარები “პოლიტიკურად მოტივირებული მართლმსაჯულების დასრულებასა და პოლიტპატიმრების დაუყოვნებლივ გათავისუფლებას მოითხოვენ”.
ევროპის სახალხო პარტიის EPP-ის რეზოლუციის ტექსტი გმობს “სასამართლო და სამართალდამცავი ორგანოების პოლიტიკური რეპრესიების ინსტრუმენტად გამოყენებას”.
დოკუმენტი ევროკავშირის წევრ სახელმწიფოებს მოუწოდებს, დააწესონ მიზნობრივი სანქციები “ქართული ოცნებისა” და მისი ხელშემწყობი პირების წინააღმდეგ.
“მოვუწოდებთ ევროკავშირის წევრ სახელმწიფოებს, დააწესონ მიზნობრივი სანქციები „ქართული ოცნების“ რეჟიმისა და მისი ხელშემწყობი პირების წინააღმდეგ, მათ შორის იმ პირების წინააღმდეგ, რომლებიც პასუხისმგებელნი არიან პოლიტიკურად მოტივირებულ დაპატიმრებებზე, სისხლის სამართლებრივ დევნასა და ძალადობაზე” – ნათქვამია დოკუმენტში.
საპროტესტო აქციების დარბევისას ქიმიური ნივთიერების გამოყენების შესახებ ჩანაწერია “მწვანეების” პარტიის რეზოლუციას:
“ვგმობთ მომიტინგეების დაკავებას გადაჭარბებული ძალის გამოყენებას, წამებასა და არასათანადო მოპყრობის შესახებ გავრცელებულ სანდო ცნობებს, მათ შორის, ტოქსიკური ქიმიური ნივთიერებების გამოყენების შესახებ. საქართველოს ხელისუფლებამ უნდა უზრუნველყოს სწრაფი, დამოუკიდებელი და ეფექტური გამოძიება და პასუხისგებაში მისცეს ყველა პასუხისმგებელი პირი” – წერია რეზოლუციაში.
პოლიტიკური პატიმრების გათავისუფლების მოწოდებით გამოდიან პარტიები Renew Europe ანდ ECR. ECR რეზოლუციაში წერს, რომ ევროკავშირმა თავი უნდა შეიკავოს ისეთი ფინანსური მხარდაჭერისგან, რომელიც შეიძლება სასარგებლო იყოს დემოკრატიულ უკუსვლაზე პასუხისმგებელი პირებისთვის.