აზერბაიჯანი-ირანის საზღვრის სრულად ჩაკეტვის გამო 1500-ზე მეტი რუსული სატვირთო ავტომობილი ირანს ვერ ტოვებს. ასევე, სატვირთო ავტომობილები რუსეთიდან აზერბაიჯანის გავლითაც ვეღარ გადაადგილდებიან, რის გამოც ალტერნატიულ მარშრუტად საქართველო-თურქეთის შემოვლითი გზა სახელდება. წინააღმდეგ შემთხვევაში ყველა ავტომობილს დაღესტანში გაჩერება მოუწევს – ამის შესახებ რუსული “კომერსანტი” წერს.
ნახიჩევანში ირანული დრონების ჩამოგდების შემდეგ აზერბაიჯანის ხელისუფლებამ ირანის მიმართულებით როგორც სატვირთო, ასევე, მსუბუქი ავტომობილების მოძრაობა შეაჩერა. ისინი აზერბაიჯანის საზღვარზე, ქალაქ ასტარაში, საბაჟო გამშვებ პუნქტზე არიან გაჩერებული.
საერთაშორისო სატვირთო გადაზიდვების დამოუკიდებელმა ექსპერტმა, იაშარ ჰუსეინსოიმ, რომელიც რეგიონში სატვირთოს მძღოლების საქმიანობას კოორდინაციას უწევს, “კომერსანტს” განუცხადა, რომ “ირანიდან რუსეთში და რუსეთიდან აზერბაიჯანის გავლით ირანში რუსული ავტომობილები ტრანზიტით ვეღარ გადაადგილდებიან. ჩვეულებრივ, ირანიდან აზერბაიჯანის საზღვარზე მთელი მსოფლიოდან სატვირთოების მძღოლები მხოლოდ ორ საკონტროლო პუნქტს, ასტარას და ბილასუვარს გადიან. ამასთან, რუსეთში, დაღესტნის საბაჟომ განაცხადა, რომ მოძრაობის გასაგრძელებლად და ლოგისტიკის შეფერხების თავიდან ასაცილებლად მძღოლებმა საქართველოსა და თურქეთის გავლით, შემოვლითი გზით უნდა ისარგებლონ ან ყველა ავტომობილი დაღესტანში უნდა გაჩერდეს.”