სუს-მა თინა ხიდაშელი და გუბაზ სანიკიძე გამოკითხვაზე დაიბარა.
ინფორმაციას ტვ პირველი ავრცელებს. თუმცა არც ხიდაშელი და არც სანიკიძე მდინარაძის უწყებაში მისვლას არ აპირებენ და გამოკითხვას მაგისტრატი მოსამართლის თანდასწრებით მოითხოვენ.
რა საკითხზე დაიბარეს ხიდაშელი და სანიკიძე უცნობია, თუმცა, სავარაუდოდ, ეს დღევანდელ განცხადებას უკავშირდება. გამოძიება ოცნების ირანულ კავშირებზე გაკეთებული განცხადებების შემდეგ დაიწყო.
„ბოლო დღეების განმავლობაში სხვადასხვა პირის მიერ, საჯაროდ, არაერთი ინფორმაცია გახმოვანდა საქართველოში სხვა ქვეყნების მხრიდან კადრების რეკრუტირების შესახებ და მათ შორის, იყო დადანაშაულება თუ მინიშნებები ტერორიზმის მიმართულებით.
ყურადღებით ვაკვირდებით და ვსწავლობთ როგორც ფაქტობრივი მოცემულობის საწინააღმდეგო ამ განცხადებების შინაარსს, აგრეთვე მათი ავტორების მოტივაციას, დაადანაშაულონ საქართველო მსგავს საკითხებში, განსაკუთრებით რეგიონში მიმდინარე საბრძოლო მოქმედებების
ფონზე და იმ გარემოების გათვალისწინებით, რომ ასეთი განცხადებების არცერთ ავტორს სამართალდამცველებისთვის არასდროს არანაირი ინფორმაცია არ მოუწოდებია. დაწყებულია გამოძიება და განცხადებების ავტორებს დაესმებათ კითხვები ყველა მიმართულებით, მათ შორის, საშუალება მიეცემათ გამოძიების ფარგლებში მაინც მიუთითონ რაიმე კონკრეტული ფაქტის შესახებ“ – განაცხადეს დღეს სუს-ში.