მიხეილ სააკაშვილი, რომელიც დღეს, 20 აპრილს, თბილისის საქალაქო სასამართლოზე სიტყვით გამოდიოდა, მოულოდნელად შეუძლოდ გახდა და ექიმის დახმარება ითხოვა.
ექს-პრეზიდენტი მანდატურების დახმარებით სასამართლო დარბაზიდან გაიყვანეს. დაახლოებით 15 წუთის შემდეგ სასამართლო დარბაზში დააბრუნეს.
აღნიშნულს ნიუ-იორკის მაიმონდის ჰოსპიტლის ექიმი, ნანა გეგეჭკორი სოციალურ ქსელში ეხმაურება:
“ყოფილი პრეზიდენტის სასამართლოს კადრებიდან ექიმის თვალისთვის შესამჩნევია, რომ მას ნამდვილად აქვს ჯანმრთელობის პრობლემა. ხელი არ მიმიწვდება მისი ჯანმრთელობის მდგომარეობის ზუსტ მონაცემებზე, მაგრამ კადრებიდან რაც ჩანს მძიმე შთაბეჭდილებას ტოვებს.
არ შეიძლება სახელმწიფო ასე ცინიკურად ექცეოდეს ადამიანებს. არა აქვს მნიშვნელობა ეს ადამიანი პრეზიდენტია, მემანქანე, დამნაშავე თუ წმინდანი.
ნორმალური სახელმწიფოს ვალდებულებაა დაიცვას მოქალაქე, მიუხედავად მისი პოლიტიკურ-რელიგიურ-სოციალურ-ღირებულებით-ეთნიკური თუ კიდევ სხვა უამრავი ტიპის კუთვნილებისა. თქვენ, ვინც გადასახადებით უზრუნველყოფთ ამის ჩამდენ ჩინოვნიკების გასამრჯელოს, თქვენდაუნებურად ხდებით პროცესის თანამონაწილე.
ზოგადად ყველაფერი რასაც სახელმწიფოს სახელით მთავრობა სჩადის, არის ყველა იმ ადამიანის პასუხისმგებლობა ვინც მას ირჩევს, ინახავს და მმართველობას უხანგძლივებს. იგივე ეხება უკრაინასთან მიმართებაში ჩვენი ქვეყნის ორაზროვან დამოკიდებულებას.
როცა შეიძლება სახელმწიფო ასე მოექცეს ადამიანს, ვისაც უწყვეტ რეჟიმში აკვირდება საერთაშორისო ინსტიტუტები, წარმოიდგინეთ, როგორ დაგჩაგრავენ მათ ვისაც არავინ გიპატრონებთ გისოსებს მიღმა რომ აღმოჩნდეთ.
თქვენი კეთილდღეობისთვისაა აუცილებელი, რომ ადამიანის ჯანმრთობის უფლების მიმართ ასეთი ცინიკური დამოკიდებულება არ დაუშვათ.
P.S. ვიცი, რომ უამრავი სხვა პატიმარია მიუხედავი და სწორედ ამიტომ ვწუხვარ ყოფილ პრეზიდენტზე, ამ შემთხვევაში როგორც უსამართლობის კრებით სახეზე. არც იმ 9 წლის შეხსენებაა საჭირო. წარსულში ჩადენილი ვერანაირი დანაშაული ვერ გაამართლებს მიმდინარე ან სამომავლოდ დაგეგმილ დანაშაულს” , – წერს გეგეჭკორი “ფეისბუქი” – პირად გვერდზე.
ცნობისთვის, დღევანდელ სასამართლო პროცესზე მიხეილ სააკაშვილმა კიდევ ერთხელ აღნიშნა, რომ მას სათანადო მკურნალობა არ უტარდება და ისაუბრა ჯანმრთელობის მძიმე მდგომარეობაზე.
მისი თქმით, დაიკლო 12 კგ, რამდენიმე დღის წინ წაერთვა ფეხები და ვერ ახერხებდა გადაადგილებას. ადვოკატებმა დააყენეს შუამდგომლობა დაუშვან მასთან “ემპათიას” კონსილიუმის წევრები, თუმცა მოსამართლემ ეს ნაწილი არ დააკმაყოფილა.
https://mix.metronome.ge/27482-2/
3,442 ნახვა
