ევროკომისია განცხადებას ავრცელებს, რომლის მიხედვითად საჭიროა ევროკავშირის საზღვარზე საქართველოს ყველა მოქალაქის მიმართ გაძლიერებული კონტროლის დაწესება.
“კომისიამ დღეს მიიღო სახელმძღვანელო მითითებები წევრი ქვეყნების საკონსულოებისა და სასაზღვრო სამსახურებისთვის გადაწყვეტილების ეფექტური აღსრულების მიზნით:
რეკომენდებულია ევროკავშირის საზღვარზე საქართველოს ყველა მოქალაქის მიმართ გაძლიერებული კონტროლის დაწესება.
საქართველოს ხელისუფლების წარმომადგენლებმა ოფიციალური მიზნით მგზავრობისას აუცილებლად დიპლომატიური ან სამსახურებრივი პასპორტით უნდა ისარგებლონ (რომელზეც უკვე ვიზა იქნება საჭირო). წესების დარღვევამ შესაძლოა ქვეყანაში შესვლის აკრძალვა გამოიწვიოს.
წევრმა ქვეყნებმა უნდა უზრუნველყონ საქართველოს ყველა მოქალაქის შემოწმება ეროვნულ და ევროპულ ბაზებში (VIS, SIS და ა.შ.).
დიპლომატიური და სამსახურებრივი პასპორტების მფლობელებისთვის ვიზის გაცემისას რეკომენდებულია საფუძვლიანი შემოწმება, გასაუბრების ჩატარება და დამატებითი დოკუმენტების მოთხოვნა. ნებისმიერი ეჭვის შემთხვევაში, ვიზის გაცემაზე უარი უნდა ითქვას.” – ნათქვამია ევროკომისიის განცხადებაში.
დღეს ევროკომისიამ დიპლომატიური პასპორტების მფლობელებისთვის უვიზო მიმოსვლა საბოლოოდ შეაჩერა. ამიერიდან, შენგენის ზონაში ოფიციალური მიზნით შესვლისას მათ ვიზა დასჭირდებათ. “ვიზების შეჩერების მექანიზმი ამოქმედდა საპასუხოდ საქართველოს მიერ უვიზო რეჟიმით ნაკისრი ვალდებულებების მიზანმიმართული და სისტემატური დარღვევებისთვის დემოკრატიისა და ფუნდამენტური უფლებების სფეროში.” – ვკითხულობთ განცხადებაში.