კახა კალაძე უკრაინის ევროკავშირში გაწევრიანების შესახებ მარტა კოსის განცხადებას გამოეხმაურა და განაცხადა, რომ ადრე ხშირად საუბრობდნენ უკრაინის ევროკავშირის წევრობაზე, როგორც შეუძლებელზე, და მსგავსი დამოკიდებულება საქართველოს მიმართაც არსებობდა.
მისივე თქმით, თავად ევროკავშირის წევრი ქვეყნებიც უდიდესი გამოწვევების წინაშე დგანან, მსოფლიოში შექმნილი დაძაბული მდგომარეობიდან გამომდინარე.
„ჩვენ ვიცით, რეალობა რა არის. ჯერ კიდევ როდის ამბობდნენ იმას, რომ შეუძლებელია, უკრაინა გახდეს ევროკავშირის წევრი ქვეყანა, საქართველოს მიმართაც იგივე დამოკიდებულება იყო. ვიღაცები ქმნიდნენ ილუზიას, რომ ხვალ ევროკავშირში მიგვიღებდნენ, მაგრამ ეს ასე არ არის. არ უნდა მოვატყუოთ ხალხი, რეალობაზე უნდა ვისაუბროთ. ევროპა უდიდესი გამოწვევების წინაშე დგას. ვხედავთ, ევროკავშირის წევრ ქვეყნებს ერთმანეთში რა ურთიერთობა აქვთ, როგორი დაძაბულობაა. მოვისმინეთ განცხადებები ბალტიისპირეთის ქვეყნების მხრიდანაც. ზოგადად, მსოფლიოში დაძაბული სიტუაციაა“, – განაცხადა კახა კალაძემ.
გაფართოების საკითხებში ევროკომისარი მარტა კოსი Bloomberg News-სთან საუბარში ამბობს, რომ არასტაბილური სამყარო უკრაინის გაწევრიანების პროცესის დასაჩქარებლად ახალ წესებს მოითხოვს. მან ასევე დაადასტურა, რომ ამჟამინდელი პირობების გათვალისწინებით, ქვეყანა ვერ შეძლებს კავშირში გაწევრიანებას 2027 წლისთვის, როგორც ეს დაგეგმილია.