ირანი ელოდება და მზადაა, წინ აღუდგეს აშშ-ის სამხედროების ნებისმიერ სახმელეთო შემოჭრას, – ამის შესახებ ირანის საგარეო საქმეთა მინისტრმა, აბას არაღჩიმ NBC News-თან ინტერვიუში განაცხადა.
ირანის საგარეო საქმეთა მინისტრმა აღნიშნა, რომ მისმა ქვეყანამ ისწავლა წინა კონფლიქტებიდან და ახლა უფრო ქმედითი საბრძოლო ძალა ჰყავს, რომელსაც ამერიკელი ჯარების წინააღმდეგ ბრძოლა შეუძლია, თუ ისინი ირანში შეიჭრებიან.
„ჩვენ დარწმუნებულები ვართ, რომ შეგვიძლია მათთან დაპირისპირება და ეს მათთვის დიდი კატასტროფა იქნება… როდესაც ვთქვი, რომ ველოდებით მათ, ეს არ ნიშნავდა, რომ ველოდებით ომის გაგრძელებას. ჩვენ მოვემზადეთ ნებისმიერი სცენარის, ნებისმიერი მოვლენის, ნებისმიერი შესაძლებლობის წინააღმდეგ დასაპირისპირებლად და ვიცით, რომ ამის მოგვარება შეგვიძლია“, – განაცხადა აბას არაღჩიმ.
მინისტრის თქმით, ირანი არ ითხოვს ცეცხლის შეწყვეტას და ვერ ხედავს აშშ-თან მოლაპარაკების მიზეზს.
არაღჩიმ განაცხადა, რომ აშშ-მა ვერ მიაღწია სწრაფ გამარჯვებას და რეჟიმის შეცვლას ირანში, მიუხედავად იმისა, რომ გასულ კვირას აშშ-ისრაელის მიერ განხორციელებული დარტყმის შედეგად უზენაესი ლიდერი აიათოლა ალი ხამენეი მოკლეს.
„მათ ეს ვერ შეძლეს და ახლა ცდილობენ, გაამართლონ ის, თუ რატომ დაგვესხნენ თავს. უამრავი მიზეზი წარმოადგინეს, მაგრამ არცერთმა იმუშავა“, – აღნიშნა ირანის საგარეო საქმეთა მინისტრმა.