“ქართული ოცნების” თავმჯდომარის, ირაკლი კობახიძის განცხადებით, სამი ქართული ტელევიზია: მთავარი არხი, ფორმულა და TV პირველი რუსული პროპაგანდით არის დაკავებული. აღნიშნული მან “პალიტრანიუსის” გადაცემაში “360 გრადუსი” ჟურნალისტის კითხვის საპასუხოდ თქვა, – თუ რას აკეთებს საქართველოს ხელისუფლება იმისთვის, რომ ქვეყანაში რუსული პროპაგანდა აღიკვეთოს.
“ვერც „მთავარ არხს“, ვერც „ფორმულას“, ვერც „ტვ პირველს“ ვერ დავხურავთ. ჩვენ ვიცით რეალურად პრობლემა სად არის, რომელ ტელევიზიებს აქვს გავლენა და ეს გავლენიანი ტელევიზიები, თავის ფარგლებში, როგორ აწარმოებენ იმ პროპაგანდას, რომელიც რუსეთის წისქვილზე ასხამს წყალს – ესენი არიან ზუსტად ეს არხები. რეალურად, მათი მხრიდან, წარმოებს მუდმივი პროპაგანდა, რაც ხელს აძლევს რუსეთის ფედერაციას. იგივე ომის პროპაგანდა, რაც მათი პარტიის და მათი ტელევიზიების მხრიდან წარმოებს. ესეც არის ბუნებრივია, რუსული თამაში. აქედან გამომდინარე, ვინ არის რუსული პროპაგანდით დაკავებული და ვინ არა, ეს არის დღესავით ნათელია“, – განაცხადა კობახიძემ.
“ქართული ოცნების” თავმჯდომარის აღნიშნულ განცხადებას ჟურნალისტი ინგა გრიგოლია სოციალურ ქსელში ირონიული სახის პოსტით ეხმაურება:
“უკვე მართლა აღემატება ჩემს ძალებს ამათზე კომენტარის გაკეთება, ღმერთო, სად გადავიხვეწო? სად წავიდე? რა გავაკეთო? ან ამათ უშველე, ღმერთო, ან მართლა გამოუშვი პატარა მეტეორი ( გენიოსი იყო, ვინც პირველად თქვა, რუსკი კარაბლ, იდი…….ო)”, – წერს გრიგოლია “ფეისბუქი”-ს პირად გვერდზე.
1,348 ნახვა
