ირანის უზენაეს ლიდერად ალი ხამენეის შვილი, მოჯთაბა აირჩიეს – ამის შესახებ ოპოზიციური ინგლისურენოვანი ირანული მედია, Iran International-ი საკუთარ წყაროებზე დაყრდნობით წერს.
მედიის ცნობით, მოჯთაბა ხამენეის უზენაეს ლიდერად არჩევა ირანის ისლამური რევოლუციის გუშაგთა კორპუსის ზეწოლის ფონზე მოხდა.
ამავე ცნობას ავრცელებს ისრაელის მედიაც. Ynet-ი წერს, რომ ასამბლეა მოჯთაბა ხამენეის ირანის უზენაეს ლიდერად მომდევნო საათებში გამოაცხადებს.
მოჯთაბა ხამენეი ულტრაკონსერვატიული ბანაკის ერთ-ერთი ყველაზე გავლენიანი ფიგურაა. ის მამის მსგავსად რადიკალური პოზიციებით გამოირჩევა, რაც გამოიხატება რეჟიმის მოწინააღმდეგეების სასტიკ ჩახშობაში ქვეყნის შიგნით და აგრესიული საგარეო პოლიტიკის მხარდაჭერაში. მოჯთაბა საშუალო რანგის სასულიერო პირია და თეოლოგიას ყუმის სემინარიაში ასწავლიდა. მიუხედავად იმისა, რომ მას არასდროს ჰქონია ოფიციალური პოლიტიკური თანამდებობა, ის წლების განმავლობაში ითვლებოდა მამის გარემოცვის „კარისმცველად“ და უმჭიდროესი კავშირი ჰქონდა „ისლამური რევოლუციის გუშაგთა კორპუსთან“. სწორედ ამ ფარული გავლენის გამო, 2019 წელს აშშ-მა მას პერსონალური სანქციები დაუწესა, როგორც უზენაესი ლიდერის პირდაპირ წარმომადგენელს.
აიათოლა ალი ხამენეი აშშ-სა და ისრაელის პირველი იერიშების შედეგად მოკვდა.