შვილმკვდარი დედა საქართველოს პროკურატურას ერთკვირიან ვადას აძლევს. 23 წლის თემურ ხადურის ბურუსით მოცული გარდაცვალებიდან წელიწადნახევრის შემდეგ, ოჯახი აცხადებს, რომ კვლავ არ იცის, რა გარემოებებში დაიღუპა ახალგაზრდა კაცი.
თემურ ხადურის დედა, ნინო გვიშიანი, შვილის სავარაუდო მკვლელობაში მონაწილე პოლიციელების პასუხისმგებლობის დაყენებას ითხოვს. მისი თქმით, წინააღმდეგ შემთხვევაში პროტესტის უკიდურეს ფორმას მიმართავს.
გვიშიანი აცხადებს, რომ საქმე ფორმალურად გამოძიებულად მიიჩნევა, თუმცა, მისი შეფასებით, წელიწადნახევრის განმავლობაში შესაძლო ბრალდებულების მიმართ სამართლებრივი ნაბიჯები არ გადადგმულა. იგი დარწმუნებულია, რომ მისი შვილი პოლიციის მიერ დევნის დროს დაიღუპა.
ის ფაქტი, რომ სამართალდამცავები 23 წლის ახალგაზრდას ეძებდნენ, ერთი წლის წინ ტელეკომპანია „ტვ პირველის“ შაბათის ეთერში გასაჯაროებული ვიდეომასალითაც დასტურდება. სოფელ სიმონეთში, ერთ-ერთ ფერმაზე დამონტაჟებული კამერის ჩანაწერში ჩანს, როგორ მიმდინარეობს დევნა დაუსახლებელ ტერიტორიაზე.
23 წლის სტიქაროსნის ცხედარი 2024 წლის 28 აგვისტოს ქუთაისი–თერჯოლის მაგისტრალთან, მდინარეში იპოვეს. ექსპერტიზის ეროვნულმა ბიურომ მაშინ გარდაცვალების ზუსტი დრო და მიზეზი ვერ დაადგინა, თუმცა დასკვნაში აღნიშნულია, რომ ცხედარს სიცოცხლის დროინდელი დაზიანებები აღენიშნებოდა. დოკუმენტების მიხედვით, ახალგაზრდა კაცს ბლაგვი საგნით მიყენებული ტრავმები ჰქონდა.