რაღაც შიდა თეატრი ჩამოაყალიბეს და უნდათ, რაც შეიძლება მეტი მაყურებელი ჰყავდეთ. ამ მაყურებლების „ბაბლში“ გარკვეული რაოდენობა შეაგროვეს, მაგრამ მთლიანად საქართველოზე გავლენა ვერ მოახერხეს, – ამის შესახებ პარლამენტის პირველმა ვიცე-სპიკერმა, გია ვოლსკიმ განაცხადა.
მისი თქმით, მიზანი ძალიან მძიმე და შავბნელია.
„იმ იდეით დაიშალნენ, რომ ეჩვენებინათ, თითქოს პლურალისტური ოპოზიციური საზოგადოებაა, რომელიც სხვადასხვა ფლანგიდან ერთი მიმართულებით უტევს, მაგრამ ქვეყნის განვითარებასთან დაკავშირებით სხვადასხვა მოსაზრება გააჩნია. ჩამოყალიბდნენ და მათი ეს სამოქმედო გეგმა დავიწროვდა, ერთ კალაპოტში ჩაჯდა და ქვეყნის დანგრევას გულისხმობს. ისინი არასდროს უარყოფდნენ, რომ „ნაცმოძრაობაში“ ლიდერები იყვნენ. იმ მთავარ პირობას ვერ ასრულებენ, რომ იქნებ მოსახლეობას როგორმე გაუჩნდეს განცდა, რომ ეს სხვადასხვა ხალხია. იგივე ხალხია, იგივე გენპროკურორი, იგივე გენერალური მდივანი, იგივე მინისტრი, იგივე პოლიტსაბჭოს წევრი და „ნაცმოძრაობასთან“ და სააკაშვილთან დაკავშირებული. სააკაშვილი მათი ლიდერია. რასაკვირველია, ამასაც არავინ მალავს, მაგრამ მთავარი ეს არ არის. მთავარია, რა არის მათი მიზანი. მიზანი ძალიან მძიმე და შავბნელია. იქით სალომე ზურაბიშვილს საერთოდ აღარ ახსენებენ. აქეთ „ლელო“ და გახარიას პოლიტიკური პარტიები გვერდზე დარჩნენ, თითქოსდა ამ ხნის განმავლობაში არასდროს უთანამშრომლიათ. ამით ცდილობენ, გარკვეული პლურალისტური გარემოს შენარჩუნებას, მაგრამ, რეალურად, საზოგადოებამ გადაუსწრო ცოდნაშიც, ინტელექტშიც და ხალხი ასე ადვილად აღარ ტყუვდება. სალომე ზურაბიშვილს სხვა გზა არ დარჩენია. მაგ ადამიანს ენერგიაც აღარ აქვს. ხელში ქარტია მისცეს, ქარტიას ხელი ყველამ მოაწერა და ახლა მოუწოდებდნენ, რომ ეს ქარტია კაბინეტიდან სააბაზანოში გადაიტანოს. ეს ის პრობლემაა, რომელიც მას ახასიათებს. პრაქტიკულად, ისეთ პოზიციაში დატოვეს, როდესაც პრეზიდენტის დროშით დაიარება და ამბობს, პრეზიდენტი ვარო. უკვე საერთოდ ჯანმრთელობის მდგომარეობასთან დაკავშირებით ეჭვებს ქმნის საერთოდ. ამ როლში დატოვეს სალომე ზურაბიშვილი, რომელსაც ყველა მონაცემი გააჩნდა, რომ კარგი, მართალი, სწორი, ინტელექტუალური ლიდერი ყოფილიყო“, – განაცხადა ვოლსკიმ.