ირაკლი რუხაძის და ბიძინა ივანიშვილის “ქართული ცემენტის” შემოსავალი გაორმაგდა – ინფორმაციას BMG ავრცელებს “ქართული ცემენტის” (ყოფილი „ჰაიდელბერგცემენტ ჯორჯია“) 2024 წლის ფინანსურ ანგარიშზე დაყრდნობით.
დოკუმენტის თანახმად, გასული წლის განმავლობაში კომპანიამ 659 მილიონი ლარის შემოსავალი მიიღო, რაც წინა წლის ანალოგიურ პერიოდთან შედარებით 95 მილიონი ლარით მეტია. კომპანიის მოგება 189 მილიონ ლარს შეადგენს, რაც 2023 წლის 96 მილიონი ლარის მოგებასთან შედარებით ორჯერ არის გაზრდილი. ფინანსური ანგარიშგების თანახმად, 2024 წლის 31 დეკემბრის მდგომარეობით კომპანიის აქტივების საერთო ღირებულება 627 მილიონი ლარს შეადგენს. გერმანული Heidelberg Materials-ი 2023 წლამდე კომპანიაში 45%-იან წილს ფლობდა, თუმცა ის ბიძინა ივანიშვილის თანაინვესტირების ფონდმა და ბიზნესმენ ირაკლი რუხაძის ჯგუფმა “ჰანიველ პარტნერსმა” გამოისყიდეს. კომპანია გარკვეული პერიოდით ინარჩუნებდა ჰაიდელბერგ ცემენტის ბრენდის სახელს, ხოლო 2024 წლის აგვისტოდან მომხმარებელს პროდუქცია “ახალი ჰანიველ ცემენტის” სახელით შესთავაზა.
2024 წელს „ქართულმა ცემენტმა“ მომხმარებლებთან გაფორმებული ხელშეკრულებებიდან ჯამში 564.7 მილიონი ლარის შემოსავალი მიიღო, რაც 2022 წლის 513.5 მილიონ ლართან შედარებით 51.2 მილიონი ლარით მეტია.
რაც შეეხება ხარჯებს – ფინანსური ანგარიშის თანახმად, კომპანიის მთავარი ხარჯები ასე ნაწილდებოდა – ნედლეული 99 მლნ ლარი; საწვავი 61 მილიონი ლარი; ნედლეულის ტრანსპორტირება 59 მილიონი ლარი; კომპანიას ასევე გააჩნდა 44 მილიონი ლარის ელექტროენერგიის ხარჯი, სახელფასო ხარჯები კი 38 მილიონ ლარს შეადგენდა.