კანადელი ადვოკატები გიორგი მიქაძის სისხლის სამართლის საქმეზე მასალებს აგროვებენ. იურისტები ჩრდილოეთ ამერიკიდან საკუთარი ქვეყნის მოქალაქის დასაცავად ჩაერთნენ. უკვე მეორე სხდომაა ადვოკატები ისმენენ რა მტკიცებულებების საფუძველზე აპირებს საქართველოს საგამოძიებო უწყება მათი ქვეყნის მოქალაქის მრავალი წლით ციხეში გაშვებას.
ლევან ჯანგველაძის მკვლელობის ორგანიზებაში ბრალდებულის ადვოკატები ჯერ არ ამხელენ რა გეგმა აქვთ განაჩენის შემდეგ. გიორგი მიქაძე ორი ქვეყნის მოქალაქეა, თუ საქართველოში გამამტყუნებელ ვერდიქტს გამოუტანენ, კანადას როგორც მეორე სამშობლოს უფლება აქვს საკუთარი ქვეყნის მოქალაქის გადაცემა მოითხოვოს.
გახმაურებული მკვლელობის ორგანიზების საქმის ფიგურანტი განსასჯელის სკამზე მჯდომი ისმენს მოწმეთა ჩვენებებს, რომელიც პროკურატურას მის წინააღმდეგ ჩვენების მისაცემად მოჰყავს. არ ახსოვთ, არ დაუნახავთ ან საერთოდ არ სურთ რომ ჩვენება მისცენ – ასეთია გიორგი კაჭკაჭიშვილის პოზიცია – საქმის კიდევ ერთი ბრალდებულის. იარაღის გასაღების მუხლით დაკავებულმა თქვა, რომ არც ჯოხაძეს და არც მიქაძეებს არ იცნობს, საქმესთან შემხებლობა არ აქვს და სასამართლოსაც ვერანაირ ინფორმაციას მიაწვდიდა.
გიორგი კაჭკაჭიშვილი ამტკიცებს, რომ ვიდეოკადრები, რომელიც სანდრო წივწივაძის განაჩენის წინაპირობა გახდა, გამოძიებამ ტელეფონში ჩაუდო.
რატომ ურიცხავდა გიორგი ჯოხაძის მეუღლე დაქირავებულ ქილერს ანგარიშზე თანხას – ამ კითხვაზე პასუხების მოსმენას პროკურატურა ელენე ძაძუასგან ითხოვს. ჯოხაძის ცოლი სასამართლოს წინაშე პარასკევს დაიკითხება.