“პერსონალური სანქციები ბიძინა ივანიშვილის, ოცნების ლიდერებს, მოსამართლეებს, პროკურორებსა და სხვა ოფიციალურ პირებს” – ევროპარლამენტის საგარეო ურთიერთობების კომიტეტში საქართველოს შესახებ ანგარიში წარადგინეს, რომელიც 2025 წელს მიმოიხილავს.
ანგარიშში საუბარი საქართველოში არსებულ დემოკრატიულ უკუსვლაზე და “ოცნების” ავტორიტარულ მიმართულებაზე. დოკუმენტში ხაზგასმით არის აღნიშნული ბიძინა ივანიშვილისა და “ოცნების” სხვა მაღალჩინოსნების სანქცირების აუცილებლობა:
“ანგარიში ხაზს უსვამს, რომ ევროკავშირისა და მისი წევრი ქვეყნების მიერ დაწესებული მიზნობრივი პერსონალური სანქციები ბიძინა ივანიშვილის, „ქართული ოცნების“ ძირითადი ლიდერების, მოსამართლეების, პროკურორებისა და სხვა იმ ოფიციალური პირების წინააღმდეგ, რომლებიც პასუხისმგებელნი არიან საქართველოში დემოკრატიულ უკუსვლაზე, საარჩევნო თაღლითობაზე, ადამიანის უფლებების დარღვევასა და პოლიტიკური ოპონენტებისა და აქტივისტების დევნაზე, წარმოადგენს დაუსჯელობის წინააღმდეგ ბრძოლის მნიშვნელოვან ინსტრუმენტს; მიესალმება იმ ფაქტს, რომ ევროკავშირის დონეზე ერთსულოვნების არარსებობის პირობებში, წევრი ქვეყნების მზარდმა რაოდენობამ შემოიღო ინდივიდუალური სანქციები საქართველოს ოფიციალური პირების წინააღმდეგ; მოუწოდებს სხვა წევრ ქვეყნებს, მიჰყვნენ ამ მაგალითს” – წერია დოკუმენტში.
ანგარიში ევროპარლამენტარებს საქართველოს საკითხებზე მომუშავე რასა იუკნევიჩიანემ გააცნო, რასაც ევროპარლამენტარების კრიტიკული გამოსვლები მოჰყვა.