ირანი და აშშ ჟენევაში მოლაპარაკებების სახელმძღვანელო პრინციპებზე შეთანხმდნენ, თუმცა კიდევ ბევრი სამუშაოა შესასრულებელი, – განაცხადა სამშაბათს ირანის საგარეო საქმეთა მინისტრმა, აბას არაღჩიმ.
ირანის მთავარმა დიპლომატმა განაცხადა, რომ არაპირდაპირი მოლაპარაკებები აშშ-ის სპეციალურ წარმომადგენელთან, სტივ ვიტკოფთან და პრეზიდენტ დონალდ ტრამპის სიძესთან, ჯარედ კუშნერთან უფრო „სერიოზული“ იყო, ვიდრე ამ თვის დასაწყისში ომანში გამართული წინა რაუნდი.
მან შეხვედრები შეაფასა როგორც „პოზიტიური“, თუმცა გააფრთხილა, რომ შეთანხმება „სწრაფად“ ვერ იქნება მიღწეული.
„იმედი გვაქვს, რომ ამ სამუშაოს სწრაფად დასრულებას შევძლებთ და ამისთვის დროის გამოყოფას მოვახერხებთ. თუმცა, ნებისმიერ შემთხვევაში, როდესაც საქმე ტექსტზე მუშაობაზე მიდგება, პროცესი უფრო დეტალური და რთული ხდება“, – აღნიშნა აბას არაღჩიმ.
„ჩვენ მივაღწიეთ ურთიერთგაგებას სახელმძღვანელო პრინციპებზე, თუმცა შეთანხმების პროექტის მომზადებისა და წერის ფაზა უფრო რთული იქნება“, – განაცხადა მან და დასძინა, რომ მოლაპარაკებების შემდეგი რაუნდის თარიღი ჯერჯერობით დადგენილი არ არის.
არაღჩიმ განაცხადა, რომ მხარეები შეთანხმდნენ შეთანხმების ტექსტის პროექტების მომზადებასა და მათ გაცვლაზე მოლაპარაკებების მომდევნო რაუნდამდე.
„ახლა ჩვენ გაცილებით ნათელი სურათი გვაქვს იმისა, თუ რა სამუშაო უნდა შესრულდეს და რა უნდა გაგრძელდეს. რა თქმა უნდა, ორივე მხარეს ჯერ კიდევ ბევრი აქვს სამუშაო პოზიციების დასაახლოებლად, მაგრამ, სულ მცირე, ახლა უკვე გვაქვს ჩარჩო და უფრო მკაფიო გზა წინსვლისთვის“, – დასძინა მან.