“სამხარაულის ექსპერტიზის დასკვნით, ბაჩო ახალაიასა და პაატა ბურჭულაძის საუბრის აუდიოჩანაწერი დამონტაჟებულია და მისი ავთენტურობის დადგენა შეუძლებელია” – ამის შესახებ სამხარაულის ექსპერტიზის ბიუროს 2 ექსპერტის დასკვნაშია ნათქვამი. დასკვნა საქმეში თავად პროკურატურამ ჩადო.
“თვითონ უდევთ თავიანთი ექსპერტიზის დასკვნა, რომ ჩანაწერი ავთენტური არ არის. პირდაპირ ასე უდევთ დასკვნა” | ამბობს ახალაიას ცოლი, ანი ნადარეიშვილი, რომელსაც საქმეში მოწმის სტატუსი აქვს.
ჩანაწერი ახალაიას ბრალდების საქმის ერთ-ერთი მთავარი მტკიცებულებაა.
თავდაცვის ყოფილი მინისტრი, ბაჩო ახალაია 2025 წლის 25 დეკემბერს დააკავეს. სუს-ის მტკიცებით, 4 ოქტომბრის მოვლენებს სწორედ ის ხელმძღვანელობდა. დაკავებამდე, 10 ოქტომბერს, ბაჩო ახალაია ცენტრალური კრიმინალური პოლიციის დეპარტამენტში, მისი ცოლი ანი ნადარეიშვილი კი სუს-ში დაიბარეს – ორივე საქმე 4 ოქტომბრის აქციას უკავშირდებოდა. ახალაიასგან ხმის ნიმუშიც აიღეს. გამოძიება არკვევდა ოცნების პროპაგანდისტული მედიით გავრცელებული აუდიოჩანაწერის ავთენტურობას, სადაც თითქოს ახალაია ბურჭულაძეს, 4 ოქტომბრის აქციის გეგმებზე ესაუბრება. თავდაცვის ყოფილმა მინისტრმა ჩანაწერის ნამდვილობა უარყო.
ახალაიას 27 დეკემბერს აღკვეთის ღონისძიების სახით პატიმრობა შეუფარდეს.
დღეს თბილისის საქალაქო სასამართლოში წინასასამართლო სხდომა გაიმართება. პროკურატურა სხდომის დახურვას მოითხოვს.