საპროტესტო მსვლელობის მონაწილეები ილიას სახელმწიფო უნივერსიტეტის “ა” კორპუსთან მივიდნენ.
ადგილზე, აქციის სხვა მონაწილეებთან ერთად, მსვლელობის მონაწილეებს დახვდათ ილიას სახელმწიფო უნივერსიტეტის რექტორი, ნინო დობორჯგინიძე.
აქციის მონაწილეებს ადგილზე მოტანილი აქვთ ბანერები: “უნივერსიტეტი ავტონომიურია”, “მთავრობამ რა იცის ცოდნა რა ხილია?”.
ამასთან, ისმის შეძახილები: “განათლებისთვის, ბოლომდე”, “ავტონომია უნივერსიტეტებს”.
მსვლელობის განმავლობაში აქციის მონაწილეებს ასევე სიგნალებით ამხნევებდნენ მანქანებიდან.
დემონსტრანტები განათლების სამინისტროს მიერ სახელმწიფო უნივერსიტეტებში კვოტების განაწილებასთან დაკავშირებით მიღებულ გადაწყვეტილებებს აპროტესტებენ.
მანამდე აქცია გაიმართა დედაენის ბაღში, სადაც სტუდენტები და ლექტორები სიტყვით გამოვიდნენ.
ამასთან, დღევანდელი აქციის ორგანიზატორების ინფორმაციით, 16 თებერვალს საპროტესტო აქცია გაიმართება განათლების სამინისტროსთან, სადაც ისინი 14:00 საათზე შეიკრიბებიან.
ცნობისთვის, განათლების მინისტრმა დაასახელა, რომელი სახელმწიფო უნივერსიტეტი რომელ ფაკულტეტზე გამოაცხადებს მიღებას. ასევე დადგინდა კვოტები, თუ რამდენ სტუდენტს მიიღებენ უნივერსიტეტები.
კერძოდ, 2026-2027 სასწავლო წელს, თსუ-ში არსებულ პროგრამებზე, ჯამურად, მისაღებ სტუდენტთა ოდენობა 6650-ით განისაზღვრა.