პრო ევროპული აქციების დროს დაკავებული არჩილ მუსელიანცი იმ საგნების ჩამონათვალს ასახელებს, რომლებიც ციხის ადინისტრაციამ პატიმრებისთვის აკრძალა. ამის შესახებ ის ტვ პირველისთვის გამოგზავნილ წერილში წერს.
მუსელიანცის განცხადებით, შეზღუდვები შეეხო ჰიგიენურ საშუალებებს, საკანცელარიო ნივთებსა და სხვა პირად ნივთებს. მისი თქმით, განსაზღვრულია ასევე პატიმრებისთვის ამანათების გაგზავნისა და სატელეფონო ზარების გრაფიკი, რომელიც, როგორც წერილში აღნიშნავს, კორპუსებისა და ფლიგელების მიხედვით განსხვავდება.
წერილში მუსელიანცი პენიტენციური სამსახურის საჯარო განცხადებებსაც ეხმიანება და აცხადებს, რომ გავრცელებულ ინფორმაციასთან დაკავშირებით საკუთარ პოზიციას ყოველთვის დააფიქსირებს.
“გიგზავნით ოფიციალურ დანართს, თუ რისი შემოგზავნაა შესაძლებელი 8 თებერვლის მდგომარეობით და ჩამოვწერ, რა აკრძალეს. აიკრძალა ყველანაირი ჰიგიენური საშუალება კბილის ჯაგრისის გარდა, საპონიც კი. აიკრძალა ფეხსაცმლის თასმები, კალმები, ყველანაირი ფანქრები, ბლოკნოტები, რვეულები. აიკრძალა ისეთი წიგნები, რაც, რეჟიმის თვალსაზრისით, რეჟიმს საფრთხეს შეუქმნის. აიკრძალა ისეთი თეთრეული და პირსახოცები, რაც მოთეთრო და ღია ფერის არ არის. პატიართან შეგზავნის უფლება აქვთ მხოლოდ თვეში ორჯერ. დარეკვებთან დაკავშირებით რაც გავრცელდა, არის სიმართლე, რადგან მთელი საპატიმრო საუბრობს ამის შესახებ.
კორპუსებს კვლავ ანსხვავებენ ერთმანეთისგან და არა მარტო კორპუსებს, საკნებსაც კი. მაგალითად, მე ვიმყოფები მესამე კორპუსში და თებერვლის მდგომარეობით, მესამე კორპუსის B ფლიგელი რეკავს ორ დღეში ერთხელ.
ამ ყველაფერს იმიტომ გწერთ, რომ პენიტენციურმა სამსახურმა თავისი ფეისბუქ პოსტებით და ლამაზი ტექსტებით შეცდომაში არავინ შეიყვანოს. როგორც კი პენიტენციური სამსახური გაავრცელებს სიცრუეს, მე ყოველ ჯერზე ვამხელ მათ. დატუსაღება არ ნიშნავს გაჩუმებას. თუ წერილების ან დარეკვის აკრძალვას დააპირებენ, ამით დამტკიცდება, რომ რეჟიმი სუსტი ყოფილა. გამაგრდით! გმირები დაგვცქერიან ზევიდან!, – წერს არჩილ მუსელიანცი.