აშშ-ის პრეზიდენტმა დონალდ ტრამპმა განაცხადა, რომ ირანში რეჟიმის შესაძლო ცვლილება „საუკეთესო გამოსავალი“ იქნებოდა და დაადასტურა, რომ პენტაგონმა ახლო აღმოსავლეთში მეორე ავიამზიდი გაგზავნა. ამის შესახებ Reuters წერს.
ტრამპის თქმით, თუ ირანთან შეთანხმება ვერ მიიღწევა, აშშ მზადაა დარტყმებისთვის, ხოლო თეირანი საპასუხო ზომებს აანონსებს. ვაშინგტონი ითხოვს, რომ ბირთვულ მოლაპარაკებებში ასევე შევიდეს ირანის ბალისტიკური რაკეტებისა და რეგიონული აქტივობების საკითხი, რასაც ირანი არ ეთანხმება.
ანონიმური წყაროს ინფორმაციით, ავიამზიდს რეგიონამდე მისაღწევად მინიმუმ ერთი კვირა დასჭირდება. Reuters აღნიშნავს, რომ ავიამზიდ „ფორდს“ 75-ზე მეტი სამხედრო თვითმფრინავის განთავსება შეუძლია.