“განათლებას აუქმებენ – არც ფულს დავხარჯავთ ამაში და არც თქვენი ცოდნის ატანა შეგვიძლიაო! ეს არის ანტიეროვნული, ანტიისტორიული, ანტისახელმწიფოებრივი, ანტიკონსტიტუციური ქმედება. „ოცნებაზე“ ლაპარაკს ვერავის ვაკადრებ, მათგან ეს უკიდურესად ლოგიკურია. მთავარი პასუხისმგებლობა ახლა ჩვენზეა. უნივერსიტეტების დათმობა იქნება ჩვენი დანაშაული. სრული, სრული მობილიზება არის ჩვენი ვალი. სხვა შემთხვევაში, ხმის ამოღების უფლებაც არ გვექნება. დიდი მადლობა ილიას და სოხუმის უნივერსიტეტებს საქართველოს ღირსების დაცვისთვის. მათი პრინციპული, ეროვნული პოზიციისთვის. ეს ტვირთი მხოლოდ მათი არ არის, ყველამ, ყველამ უნდა დავიცვათ ქვეყანა ამ ურდოსგან. ბოლომდე!”
წერს კოალიცია ცვლილებებისთვის ერთ-ერთი ლიდერი, პატიმრობაში მყოფი ელენე ხოშტარია ქართული ოცნების ე.წ რეფორმაზე.
ცნობისთვის, 2026-2027 სასწავლო წელს, ივანე ჯავახიშვილის სახელობის სახელმწიფო უნივერსიტეტში არსებულ პროგრამებზე, ჯამურად, მისაღებ სტუდენტთა ოდენობა 6650-ით განისაზღვრა.
საქართველოს ტექნიკური უნივერსიტეტის პროგრამებზე მომდევნო სასწავლო წელს 3880 მისაღები ადგილი იქნება გათვალისწინებული, ხოლო ილიას უნივერსიტეტს, სასწავლებელში არსებულ პროგრამებზე, ჯამურად, 300 სტუდენტის მიღების შესაძლებლობა ექნება.
სახელმწიფო უნივერსიტეტებში პროგრამებზე მისაღებ სტუდენტთა რაოდენობისა და სასწავლებლებში გადანაწილების კვოტების შესახებ შესაბამისი დოკუმენტი პრემიერ-მინისტრმა გუშინ გამოსცა. დადგენილების მიხედვით, მთელი ქვეყნის მასშტაბით, ბაკალავრიატისა და ერთსაფეხურიანი საგანმანათლებლო პროგრამებზე მისაღებ სტუდენტთა ოდენობა 21 300-ით განისაზღვრა.
რაც შეეხება მაგისტრატურის საგანმანათლებლო პროგრამებს, დოკუმენტის მიხედვით, მისაღები ადგილების ოდენობა 3233 იქნება, საიდანაც 1013 თსუ-ისთვისაა განსაზღვრული, 660 სტუ-ის პროგრამებისთვის, ხოლო 60 ილია უნივერსიტეტისთვის.