“ქართული ოცნება” პლასტმასის ბოთლებით სასმელების გაყიდვის აკრძალვას გეგმავს, მათ შორის – წყლის” – ამის შესახებ სოლომონ პავლიაშვილმა გადაცემა “ბიზნესპარტნიორში” განაცხადა.
მისივე თქმით, აკრძალვა მომავალი წლიდან იგეგმება.
“ჩვენ ვფიქრობთ, რომ საერთოდ უნდა ვთქვათ პლასტმასაზე უარი და ნებისმიერ მარკეტებში, ქსელებში პლასტმასში განთავსებული სასმელები არ უნდა გაიყიდოს. ეს არის შემდგომი ეტაპი. ამიტომ ეს იქნება მომავალი წლის, სავარაუდოდ თებერვლიდან. ესეც ინიციატივაა ჯერ, რა თქმა უნდა, მთავრობას არ მიუღია გადაწყვეტილება, მაგრამ ისე მივდივართ ეტაპობრივად, რომ ბიზნესს უცებ არ დააწვეს…” – განაცხადა სოლომონ პავლიაშვილმა.
პავლიაშვილის თქმით, აკრძალვა არ შეეხება ზეთს, რომელიც პლასტმასის ბოთლებშია, ასევე, 10 ლიტრზე მეტი მოცულობის ბოთლებით წყლის გაყიდვას.
“ჩვენ მზესუმზირის ზეთზე თავი შევიკავეთ, იმიტომ რომ ის მოსახლეობის სამომხმარებლო კალათაში ერთ-ერთი განმსაზღვრელია. დასამალი არ არის და უნდა ითქვას, რომ ერთჯერადად შესაძლებელია ეს პროდუქცია გაძვირდეს კიდეც სწორედ მასალის გამო. ამიტომ, თავი შევიკავეთ ზეთთან დაკავშირებით. რაც შეეხება წყალს, დავაზუსტებ – 10 ლიტრამდე კი არა, 10 ლიტრის ზევით რჩება გამონაკლისებში, იმიტომ რომ 10 ლიტრამდე შესაძლებელია იმპროვიზაციები დაიწყოს და სხვადასხვა გამაგრილებელი სასმელების ჩამოსხმა დაიწყონ, იგივე 3-ლიტრიანებში და არის კიდეც 4-იანში, 5-იანში და ასე შემდეგ. მაგრამ 10 ლიტრს ზევით მარტო წყალი დავტოვეთ, იმიტომ რომ წყლის შემთხვევაში, რეგიონებში და თბილისში ხშირად წყლის მიწოდება შეფერხებით ხორციელდება, ამიტომ მივეცით მოსახლეობას ამ მიმართულებით [საშუალება], შეძლონ გამოიყენონ… სხვა სასმელები გამორიცხული არის” – განაცხადა სოლომონ პავლიაშვილმა.