“რუსი გენერალი ვლადიმერ ალექსეევი საყვარლის, რუსეთის პირველი არხის პროპაგანდისტ ირინა კუკსენკოვას სახლში დაჭრეს” – უკრაინელი სამხედრო ბლოგერი

რუსი გენერალი ვლადიმერ ალექსეევი საყვარლის, რუსეთის პირველი არხის პროპაგანდისტ ირინა კუკსენკოვას სახლში დაჭრეს – ინფორმაციას და ახალ დეტალებს უკრაინელი სამხედრო ბლოგერი, დენის კაზანსკი ავრცელებს და წერს, რომ გენერალი საყვარელს დაცვის თანხლების გარეშე სტუმრობდა და მათი ურთიერთობის თაობაზეც არავინ იცოდა. შესაბამისად, უკრაინელი ბლოგერი მიუთითებს, რომ მხოლოდ პროპაგანდისტ კუკსენკოვას შეეძლო გაეთქვა ადგილი და დრო, როცა საყვარელს ხვდებოდა
“ალექსეევი კუკსენკოვასთან მარტო წავიდა, ისე, რომ დაცვამაც კი არ იცოდა. ისე რომ, მხოლოდ მან და ქალმა იცოდნენ. შესაბამისად, მხოლოდ მას შეეძლო იმ ადგილის შერჩევა, სადაც იდეალურ შემთხვევაში მკვლელობის მცდელობა მოხდებოდა” – წერს უკრაინელი ბლოგერი. მისივე ინფორმაციით, მკვლელის თანამზრახველი ФСБ-სთან დაკავშირებული კომპანიის თანამშრომელი აღმოჩნდა. ინფორმაცია ოფიციალურად არ დადასტურებულა
დღეს ცნობილი გახდა, რომ დაკავებულია მესამე სავარაუდო დამნაშავეც – პაველ ვასინი. ის გენერალზე თავდასხმაში ეჭვმიტანილი ვიქტორ ვასინის შვილია. ვიქტორ ვასინი მოსკოვში მომხდარიდან მეორე დღეს დააკავეს. დუბაიში აიყვანეს და რუსეთს გადასცეს მთავარი ეჭვმიტანილი – ლიუბომირ კორბა, რომელმაც ФСБ-ს ცნობით უკრაინის უსაფრთხოების სამსახურთან “თანამშრომლობა აღიარა”. ეჭვმიტანილების სიაშია ზინაიდა სერებრიცკაია. რუსეთის მტკიცებით, ის მომხდარის შემდეგ უკრაინაში გაიქცა
რუსეთი გენერალ ვლადიმერ ალექსეევზე მომხდარ თავდასხმაში უკრაინის უსაფრთხოების სამსახურს ადანაშაულებს. უკრაინა ბრალდებებს უარყოფს. ალექსეევს 6 თებერვლის დილას, საცხოვრებელ კორპუსთან დაესხნენ თავს. ცეცხლსასროლი იარაღიდან მიყენებული მძიმე ჭრილობებით ის საავადმყოფოშია