აღიარება და მონანიება თავისუფლების სანაცვლოდ – პროკურატურა სასახლის ღობის საქმეზე დაკავებულებს გარიგებას სთავაზობს. გუშინ, ირაკლი კობახიძემ თქვა, რომ ისინი ჰუმანურობით იმოქმედებენ, დღეს, გაჩნდა კითხვა – რას ნიშნავს “ოცნების” ლიდერის ეს განცხადება და იგეგმება თუ არა აქციის რიგითი მონაწილეების გათავისუფლება?
არჩადენილი დანაშაულის აღიარება შეუძლებელია – ასეთია დაკავებულთა ნაწილის პოზიცია. განსასჯელის სკამზე მჯდომი 4 ოქტომბრის აქციის მონაწილეების ადვოკატები ამბობენ, რომ “ოცნების” გუნდი პატიმრებს დასცინის. ბრალდებულების უმრავლესობა მხოლოდ საპროტესტო აქციაზე დგომას და პრეზიდენტის სასახლის ტერიტორიაზე ყოფნას აღიარებს. ხელისუფლების ცვლილების სურვილი დაკავებულებისთვის დანაშაული არ არის, შესაბამისად საპროცესო შეთანხმებაზე საუბარსაც გამორიცხავენ.
ბრალდებულთა ნაწილის ადვოკატები სასამართლოს გადაწყვეტილების იმედად არიან, უფლებადამცველები დარწმუნებულები არიან, რომ საგამოძიებო უწყება ბრალდებას ვერ დაამტკიცებს, ვინაიდან მტკიცებულებები არასაკმარისია. ამის დამადასტურებელ მაგალითად ადვოკატებს, დღეს, საგამოძიებო უწყების მიერ პროცესზე გამოკვლეული მტკიცებულებებიც მოჰყავს – ვიდეომასალა, სადაც მბრალდებელმა დაკავებულები ვერ ამოიცნო და პროცესის გადადება მოითხოვა.