„მე და ლიზამ გადავწყვიტეთ, შევატყობინოთ ყველას, რომ ჩვენ ვართ ერთად, ჩვენ ვიწყებთ ახალ ცხოვრებას, ახალ ოჯახს”, – ამის შესახებ მიხეილ სააკაშვილი ამბობს ვიდეოში, რომელიც მისი დაკავებიდან ცოტა ხანში გავრცელდა. ვიდეოში ის უკრაინის „ვერხოვნა რადის” დეპუტატის, ლიზა იასკოს გვერდით ზის.
პირველად 2 წლის წინ მიხეილ სააკაშვილისა და ლიზა იასკოს სასიყვარულო ურთიერობაზე უკრაინულ მედია strana.news წერდა, რამდენიმე თვის წინ კი გამოაქვეყნეს სტატია, სადაც მომღერალ სოფო ნიჟარაძის შესახებ ინფორმაციას ავრცელებდნენ, რომლის თანახმად, ზაფხულში შვილთან ერთად კიევში იმყოფებოდა.
უკრაინაში ომის დაწყებამდე ლიზა იასკოსთან ექსკლუზიური ინტერვიუ ჩაწერეს. მას სოფო ნიჟარაძისა და მიხეილ სააკაშვილის საერთო შვილის შესახებაც ჰკითხეს.
“მიხეილ სააკაშვილს უკრაინის რადას დეპუტატის ლიზა იასკოს მხარდაჭერა აქვს, მაგრამ მას შემდეგ რაც გაირკვა, რომ მიხეილ სააკაშვილს ქართველი მომღერლისგან ქალიშვილი ჰყავს, სავარაუდოდ ძალიან განაწყენებულია”.
მედიამ ლიზა იასკოსთან კომენტარის ჩაწერა იტალიურ რესტორან Buffalino-ში მოახერხა:
“მე არ ვარ ის ადამიანი, ვინც სააკაშვილის ან სხვა ვინმეს ქორწინების გარეშე შეძენილი შვილების შესახებ კომენტარი უნდა გააკეთოს. მე და მიხეილი სამოქალაქო ქორწინებაში ვართ. ჩვენ გვაქვს ჩვენი ოჯახური გეგმები. სხვა ყველაფერი, რაც მის წარსულში იყო მე საერთოდ არ მაინტერესებს”, – ამბობს იასკო, სადაც დასძენს, რომ მიხეილ სააკაშვილის მრავალრიცხოვანი სასიყვარულო ურთიერთობების შესახებ ინფორმაცია მას აბსოლუტურად არ აინტერესებს.
“თუ ვინმე დაინტერესებულია სააკაშვილის პოლიტიკური სიტუაციიდან ყურადღების გადატანით, ამას წარმატებით აკეთებს. ჩემთვის მთავარია მისი სიცოცხლე და თავისუფლება და სხვა ყველა ჭორი ჩემთვის მნიშვნელოვანი არ არის” – ამბობს იასკო.
ექს-პრეზიდენტის საქართველოში დაპატიმრების შემდეგ მისი პირადი ცხოვრება არაერთხელ მოექცა ყურადღების ცენტრში. ლიზა იასკოსთან აღიარებული სასიყვარულო ურთიერთობისა და ოჯახური თანაცხოვრების შემდეგ, ახალი წლის დადგომამდე, რამდენიმე საათით ადრე სააკაშვილმა საზოგადოებას მისი და სოფო ნიჟარაძის საერთო შვილი ელის მარია სააკაშვილი გააცნო.