4 ოქტომბერს, ათონელის სასახლესთან განვითარებულ მოვლენებთან დაკავშირებით ბრალდებულმა ალექსანდრე გოგოლაძემ საქმის პროკურორის თამარ ბეჟუაშვილის აცილება მოითხოვა, რაც მოსამართლე გიორგი გელაშვილმა არ დააკმაყოფილა.
ბრალდებულის მოთხოვნა პროკურორის აცილების თაობაზე, მისი სქესი გახდა.
„ქალი არ მინდა ჩემი პროკურორი იყოს, თუ არის საშუალება, ქალი არ იყოს. თქვენს წინაშე [პროკურორს] ბოდიშს ვიხდი, თქვენ უნდა ასწავლოთ შვილებს შვილიშვილებს სიკეთე, ბევრი რაღაც, რაზეც ვოცნებობ. კარგი იქნება შვილო, თუ თქვენ პროკურორი არ იქნებით, მით უმეტეს, ასეთ საქმეზე”,- განაცხადა გოგოლაძემ.
მოსამართლემ მას განუმარტა, რომ კონკრეტულად განსაზღვრულია, თუ რა არის პროკურორის ან ზოგადად მხარის აცილების საფუძველი.
„დისკრიმინაციად ჩაითვლება რომ კონკრეტული პირის ან სახელმწიფოს ინტერესები ქალმა ან კაცმა წარმოადგინოს”,- განაცხადა მოსამართლე გიორგი გელაშვილმა.
აღნიშნულის შემდეგ, კიდევ ერთმა ბრალდებულმა კონსტანტინე კოკაიამ განაცხადა, რომ მათი მოთხოვნაა, სხდომას ტელევიზიები დაესწრონ და ხალხს ანახონ „რა ცუდი ადამიანები” არიან.
აღნიშნულის საპასუხოდ, მოსამართლემ მას უთხრა, რომ თუკი პროცესის გადაღება სურთ, ადვოკატებმა იუსტიციის უმაღლეს საბჭოს უნდა მიმართონ.
ცნობისთვის, 4 ოქტომბერს განვითარებულ მოვლენებთან დაკავშირებით დაკავებულ გოჩა ყატაშვილს, სულხან აბრალავას, კონსტანტინე კოკაიას, დავით ჟღენტს, კახაბერ მჟავანაძეს, ალექსანდრე გოგოლაძეს, დავით სტურუას, ევა შაშიაშვილს, ზაქრო ალბუთაშვილს, გენადი კელიხაშვილს, დათო ღუწკაიას, რამაზ ჯორბენაძეს, ჯანდრი თირქიას, გიორგი ჩახუნაშვილსა და ია დარახველიძეს ბრალდება საქართველოს სისხლის სამართლის კოდექსის 19-222-ე მუხლის მე-2 ნაწილის “ა“ ქვეპუნქტით წარედგინათ, რაც სტრატეგიული და განსაკუთრებული მნიშვნელობის ობიექტების ხელში ჩაგდების და ბლოკირების მცდელობას გულისხმობს ჩადენილს ჯგუფურად. მათ ბრალდება სსსკ-ის 225-ე მუხლის მეორე ნაწილით აქვს წარდგენილი, რაც ჯგუფურ ძალადობაში მონაწილეობას გულისხმობს.
ია დარახველიძე, გიორგი ჩახუნაშვილი და ევა შაშიაშვილი გიროას სანაცვლოდ თავისუფლებაში იმყოფებიან.