“სწორედ მისმა შეხვედრებმა რაღაცნაიარად შეგვინარჩუნა სახე დასავლური მისწრაფებების მიმართ” – ჩანადირი

ფოტოხელოვანი გოგა ჩანადირი სოციალურ ქსელში წერს:

“იმის ნაცვლად, რომ პრეზიდენტ ზურაბიშვილის მოწოდებას ერთიანობის თაობაზე ქმედითად გვეპასუხა, იმაზე დავიწყეთ ლაპარაკი, არღვევს თუ არა საკონსტიტუციო ნორმებს, როცა ის საზღვარგარეთ მაღალი დონის წარმომადგენლებს ხვდება.

მე თუ მკითხავთ, სწორედ მისმა შეხვედრებმა რაღაცნაიარად შეგვინარჩუნა სახე დასავლური მისწრაფებების მიმართ. და მიმაჩნია, რომ მისი ხელმოწერაც უნდა ყოფილიყო ევროკავშირის წევრობის განაცხადზე, რაც ჩვენს სურვილს დასავლეთში კიდევ უფრო ნათლად წარმოაჩენდა.

ეს იმპიჩმენტის საკითხიც ყურით მოთრეულია და არათუ მისი საჭიროება, ლაპარაკიც კი ზედმეტია. ძაბავს და აფუჭებს პოლიტიკურ მდგომარეობას. ხელისუფლების ყველა შტოს, ასევე ოპოზიციისა და მთელი საზოგადოების პასუხისმგებლობაა ერთად დგომა, ერთი მიზნის დასახვა, ქვეყნის განვითარების ერთიანი სამოქმედო გეგმის შემუშავება და განხორციელება. ეროვნული ინტერესები წმიდა და ხელშეუხებელია.

ძალა ერთობაშია”, – წერს ჩანადირი “ფეისბუქი”- ს პირად გვერდზე.

ცნობისთვის, „ქართულმა ოცნებამ“ პოლიტსაბჭოს სხდომის შემდგომ ვრცელი განცხადება გამოაქვეყნა, 14 მარტს პარლამენტში საქართველოს პრეზიდენტის სიტყვით გამოსვლის შესახებ. განცხადების თანახმად, მთავრობა იძულებული ხდება, უახლოეს მომავალში მიმართოს საკონსტიტუციო სასამართლოს და საქართველოს პრეზიდენტის მხრიდან კონსტიტუციის დარღვევის დადასტურება მოითხოვოს.

“ქართული ოცნება” მოუწოდებს საქართველოს პრეზიდენტს, გაეცნოს საქართველოს კონსტიტუციასა და პარლამენტის, მთავრობისა და პრეზიდენტის კონსტიტუციურ უფლებამოსილებებს.