“ნაციონალური მოძრაობის” წევრმა, დეპუტატმა ლევან ხაბეიშვილმა ოფიციალური ვიზიტების გაუქმების შესახებ პრეზიდენტის გუშინდელ განცხადებას სალომე ზურაბიშვილის პირადი პრობლემა უწოდა.
ლევან ხაბეიშვილის აღნიშნული პოზიცია, საქართველოს თავდაცვის ყოფილმა მინისტრმა თინათინ ხიდაშელმა სოციალურ ქსელში ასე შეაფასა – “როცა უგუნურება და პირადი ინტერესი გაბრმავებს”, – დაწერა ხიდაშელმა “ფეისბუქი”-ს პირად გვერდზე.
ცნობისთვის, საქმე ეხება, 14 მარტს, სალომე ზურაბიშვილის პარლამენტში ყოველწლიური მოხსენების დროს გაკეთებულ განცხადებას, სადაც თქვა, რომ უკრაინაში რუსეთის შეჭრის შემდეგ, საქართველოს ხელისუფლებამ ევროპის დედაქალაქებში ოფიციალურ ვიზიტების გამართვაზე უარი უთხრა. პრეზიდენტის თქმით, ამის გამო მას მოუწია, ოფიციალური ვიზიტები პირად ვიზიტებად გადაეკეთებინა.
პრეზიდენტის აღნიშნულ განცხადებაზე ლევან ხაბეიშვილმა ტელეკომპანია “პირველის” ეთერში თქვა:
“სალომე ზურაბიშვილი ჩიოდა იმას, რომ უცხოეთში არ უშვებდნენ და პრემიერმა რაღაც ვეტო დაადო მის წასვლას და თურმე თავისი კონტაქტებით წავიდა. საკუთარი პირადი პრობლემა მოყვა, რომ თურმე ევროპაში არ უშვებდნენ ამ ქალბატონს.
პირდაპირ გეუბნებით, დღეს რაც თქვა ამ ქალბატონმა არაფერი საინტერესო მასში არ იყო. ერთადერთი, მის პირად პრობლემაზე მოყვა”, – შეაფასა მან.