იურისტი ნიკა სიმონიშვილის განცხადებით, “ქართული ოცნება” ბოლო დროს მიღებული/დაიინიცირებული კანონებით და ცვლილებებით კანონში ცდილობს “აუკრძალოს ადამიანებს პოლიტიკური დამოუკიდებლობა”.
მისი თქმით, “ქართული ოცნება” კრძალავს საჯაროდ გამოხატვას – “ეს არის დამოუკიდებელი აზროვნების კონტროლი”.
ნიკა სიმონიშვილი აღნიშნავს, რომ ივანიშვილის გუნდის მიზანი “ოცნებისგან” თავისუფალი ადამიანების დაშინებაა და ახლა ვართ რეალობაში, სადაც “ადამიანები ვერ გაიგებენ, რის გამო შეიძლება აღმოჩნდნენ სასჯელაღსრულების დაწესებულებაში”.
“ქართული ოცნება” ცდილობს აკრძალოს და გააჩუმოს, აუკრძალოს ადამიანებს პოლიტიკური დამოუკიდებლობა, აუკრძალოს ადამიანებს თავისუფალი სიტყვა, აუკრძალოს ადამიანებს თავისი თავისუფალი სიტყვის საჯაროდ გამოხატვა – ეს ცვლილებები ამას მიემართება. “ქართული ოცნება” ცდილობს, რომ ადამიანები უბრალოდ დასხდნენ სახლში, ხმა არაფერზე არ ამოიღონ, შეიძლება თავისთვის ოჯახში რაღაც იწუწუნონ, მაგრამ საჯაროდ ეს პოზიციები არ უნდა გამოიტანონ, სახლში რაც გინდათ ის აკეთეთ პრინციპი აქვთ აღებული.
ამიტომ, საჯარო გამოხატვას ფაქტობრივად კრძალავენ და ეს არის არა მხოლოდ ფინანსური კონტროლი, ეს ყველაფერი, ან არა მხოლოდ არასამთავრობო ორგანიზაციების კონტროლი, ეს არის დამოუკიდებელი სიტყვის კონტროლი, ეს არის დამოუკიდებელი აზროვნების კონტროლი და ეს არის, რა თქმა უნდა, ადამიანების დაშინება, თავისუფლად მოაზროვნე ადამიანების, რომ შენ თუ შენს აზრებს საჯაროდ გამოხატავ და ღიად გამოხატავ ამის გამო სისხლისსამართლებრივი პასუხისმგებლობა დაგეკისრება. ეს არის რეალობა, როდესაც ადამიანები ვერ გაიგებენ, რის გამო შეიძლება აღმოჩნდნენ სასჯელაღსრულების დაწესებულებაში. ეს არის მცდელობა დაშინების იმ ადამიანების, რომლებიც არიან “ქართული ოცნებისგან” თავისუფლები და დამოუკიდებლები,” – განაცხადა ნიკა სიმონიშვილმა.