ირანში 26 წლის ერფან სოლტანი პატიმრობიდან გირაოს სანაცვლოდ გაათავისუფლეს – AFP

ირანში, 26 წლის ერფან სოლტანი პატიმრობიდან გირაოს სანაცვლოდ გაათავისუფლეს – ინფორმაციას AFP ავრცელებს და წერს, რომ ამის შესახებ გავრცელებული ცნობები მათ სოლტანის ადვოკატმა დაუდასტურა
“26 წლის ახალგაზრდა გუშინ გათავისუფლდა. მას უკვე დაუბრუნეს ყველა პირადი ნივთი, მათ შორის, მობილური ტელეფონი” – თქვა ადვოკატმა და განმარტა, რომ ახალგაზრდა კაცს გირაოს სახით 2 მილიარდი თომანი გადაახდევინეს, რაც დაახლოებით 12 600 აშშ დოლარია
ერფან სოლტანი 10 იანვარს, კარაჯის ფარდისში, საკუთარ სახლში დააკავეს. ირანის რეჟიმმა მას სიკვდილით დასჯა მიუსაჯა, რაც 14 იანვარს იყო დაგეგმილი. მოგვიანებით, 15 იანვარს გავრცელებული ინფორმაციით, ირანის სასამართლომ თქვა, რომ დაკავებული დემონსტრანტის, 26 წლის ერფან სოლტანის სიკვდილით დასჯა “საერთოდ არ იგეგმებოდა”. ამავე თემაზე მანამდე ირანის საგარეო საქმეთა მინისტრმა, აბას არაღჩიმაც ისაუბრა და თქვა, რომ ადამიანების ჩამოხრჩობას „არ გეგმავდნენ“
ამის შემდეგ გავრცელდა ინფორმაცია, რომ “ღვთის გმობის ბრალდებიდან” ერფან სოლტანს ბრალი “ქვეყნის შიდა უსაფრთხოების წინააღმდეგ შეკრების, შეთქმულებაში მონაწილეობასა და რეჟიმის წინააღმდეგ პროპაგანდისტულ საქმიანობაში ჩართვის” მუხლით გადაუკვალიფიცირეს, რაც პატიმრობას ითვალისწინებს და არა სიკვდილით დასჯას.