ხატია დეკანოიძის თქმით, ჯანდაცვის მინისტრის ყოფილი მოადგილის დაკავება “ოცნების” შიგნით “ორ კლანს შორის” არსებულ დაპირისპირებას უკავშირდება.
პოლიციტიკოსი ამბობს, რომ ილია ღუდუშაური მილიონებს მისი ხელმძღვანელი მინისტრის (ზურაბ აზარაშვილი) გარეშე ვერ მოიპარავდა. მსიივე თქმით, ეს არც ბიძინა ივანიშვილის გარეშე მოხდებოდა.
“ეს არის ერთი კლანის დაპირისპირება მეორე კლანთან და ეს არის გაცილებით უფრო სხვა, შიდა ბრძოლა “ოცნების” ძალადობრივ რეჟიმში. მე ვერ გეტყვით ვის დაიჭერენ კიდევ, ვის საქმეს ამოატივტივებენ, იმიტომ, რომ ეს ყველაფერი ხომ ხელოვნურია და სარჩულად ობიექტური გამოძიებას არ აქვს, მაგრამ მთავარი რაც მინდა ვთქვა არის ის, რომ აქ ბევრი ადამიანი იქნებოდა ჩართული. როდესაც მინისტრის მოადგილე ამხელა ფულს იპარავს, ეს არც მინისტრის გარეშე ხდება, არც კონკრეტული სხვა ადამიანების გარეშე არ ხდება და ზოგადად ეს არ ხდება ბიძინა ივანიშვილის გარეშე”, – აცხადებს ხატია დეკანოიძე.
ცნობისთვის, ჯანდაცვის მინისტრის ყოფილი მოადგილე, გუშინ წინ დააკავეს. ილია ღუდუშაურს ბრალი 332-ე მუხლის მეორე ნაწილით წარედგინა, რაც სამსახურეობრივი უფლებამოსილების ბოროტად გამოყენებას გულისხმობს.
საქმე ეხება 2022 -23 წლების პერიოდში სასწრაფო სამედიცინო დახმარების ავტოსატრანსპორტო საშუალებების შესყიდვას.
საქმის მასალების მიხედვით, 2022 წლის 27 სექტემბერს სამინისტრომ გამოაცხადა ტენდერი სასწრაფო სამედიცინო დახმარების ავტოსატრანსპორტო საშუალებების შესყიდვაზე. ტენდერის საბოლოო ბენეფიციარი იყო სსიპ – საგანგებო სიტუაციების კოორდინაციისა და გადაუდებელი დახმარების ცენტრი. ტენდერში მონაწილეობა მიიღო სამმა კომპანიამ, ხოლო გამარჯვებულად გამოვლინდა ერთ-ერთი კომპანია, რომელმაც ყველაზე დაბალი ფასი – 8 525 876 ლარი შესთავაზა.
ფინანსთა სამინისტროს საგამოძიებო სამსახურის ინფორმაციით, მიუხედავად ხელსაყრელი პირობებისა, ტენდერი შეწყდა ილია ღუდუშაურის დავალებით. 2023 წლის 10 მაისს კი ღუდუშაურის მითითებით ტენდერის პირობები ერთ კონკრეტულ კომპანიას მოარგეს.