ე.წ. საბოტაჟის საქმეზე გიორგი ვაშაძის სასამართლო პროცესი ჩაინიშნა.
სხდომა თბილისის საქალაქო სასამართლოში დღეს 18:00-ზე გაიმართება. სასამართლო სტრატეგია აღმაშენებლის ლიდერისთვის აღკვეთის ღონისძიების შეფარდებაზე იმსჯელებს.
2025 წლის 22 დეკემბერს თბილისის საქალაქო სასამართლომ ე.წ. საბოტაჟის საქმეზე „კოალიცია ცვლილებისთვის“ ლიდერს, ზურაბ გირჩი ჯაფარიძეს აღკვეთის ღონისძიების სახით 30 000 ლარის ოდენობის გირაო შეუფარდა. დამატებით, პოლიტიკოსს საგამოძიებო უწყებისთვის პასპორტისა და პირადობის მოწმობის ჩაბარება დაევალა.
6 ნოემბერს, გენერალური პროკურორის პოსტზე მყოფმა გიორგი გვარაკიძემ ბრიფინგზე თქვა, რომ სისხლის სამართლის საქმე აღიძრა რვა ოპოზიციონერი (მიხეილ სააკაშვილი, ზურა ჯაფარიძე, გიორგი ვაშაძე, ელენე ხოშტარია, ნიკა მელია, ნიკა გვარამია, ბადრი ჯაფარიძე და მამუკა ხაზარაძე) პოლიტიკოსის წინააღმდეგ. მათ ნაწილს საბოტაჟს ედავებიან, ნაწილს ქვეყნისთვის მტრულ საქმიანობაში დახმარებას, ნაწილს კი ხელისუფლების დამხობისკენ მოწოდებას. ზურა ჯაფარიძესა და გიორგი ვაშაძეს იდენტური მუხლებით წაუყენეს ბრალი, საბოტაჟისა (318-ე მუხლის პირველი ნაწილით – 2-დან 4 წლამდე პატიმრობა) და უცხო ქვეყნისათვის მტრულ საქმიანობაში დახმარების (319-ე – 7-დან 15 წლამდე პატიმრობა) მუხლებით.