საქართველოს საბაჟო საზღვარზე განსაკუთრებით დიდი ოდენობით არადეკლარირებული საქონლის გადმოტანის ფაქტზე ორი პირი დააკავეს – ინფორმაციას ფინანსთა სამინისტროს საგამოძიებო სამსახური არცელებს.
სამსახურის განცხადებით, დააკავეს 2 ადამიანი, რომლებმაც თურქეთის საბაჟოზე 536 028 ლარის საბაჟო ღრებულების საქონელი 48 502 ლარით დაადეკლარირეს.
მომხდარზე გამოძიება სისხლის სამართლის კოდექსის 214-ე მუხლის მეხუთე ნაწილის დ ქვეპუნქტით, მიმდინარეობს. დაკავებულებს თავისუფლების 8-დან 11 წლამდე აღკვეთა ემუქრებათ.
“გამოძიებით დადგინდა, რომ წინასწარ შეთანხმებით ჯგუფის წევრებმა, ერთ-ერთი კომპანიის სახელით, საბაჟო დეკლარაციაში ყალბი მონაცემები შეიტანეს და საქონლის საბაჟო ღირებულება 536 028 ლარის ნაცვლად 48 502 ლარით დაადეკლარირეს. აღნიშნული დეკლარაციის საფუძველზე, სატვირთო ავტომანქანით თურქეთიდან საქართველოში სხვადასხვა სახის საქონელი შემოიტანეს.
ოპერატიული ინფორმაციის საფუძველზე ჩატარებული ავტომანქანის დათვალიერების შედეგად დადგინდა, რომ დეკლარაციაში მითითებული საქონლის უმეტესი ნაწილის ნაცვლად აღმოჩნდა 536 028 ლარის საბაჟო ღირებულების არადეკლარირებული საქონელი, მათ შორის: სუნამოები, ჰიგიენის საშუალებები, ოთახის არომატიზატორები, სანტექნიკის ინვენტარი, ენერგეტიკული სასმელები, ტკბილეული და სხვა სახის პროდუქცია”. – ნათქვამია უწყების განცხადებაში.