ახლა მთავარი პრიორიტეტი ჩვენი საჰაერო თავდაცვის გაძლიერებაა, – ამის შესახებ უკრაინის პრეზიდენტი, ვოლოდიმირ ზელენსკი სოციალურ ქსელში წერს.
ვოლოდიმირ ზელენსკის განცხადებით, გასულ ღამეს რუსეთმა უკრაინის ენერგეტიკულ სექტორს დაარტყა.
„მთავარი სამიზნე ენერგეტიკული ობიექტები და კრიტიკული ინფრასტრუქტურა იყო, რომელიც ჩვენი მოსახლეობის ნორმალურ ცხოვრებას უზრუნველყოფს: გათბობასა და ელექტროენერგიას. 113 დრონი და 3 ბალისტიკური რაკეტა გაუშვეს“, – წერს ზელენსკი X-ზე.
მისი თქმით, „საჭიროა, რომ ევროპული მარაგებიდან შეიარაღების მიწოდება და აშშ-თან შეთანხმებების სწრაფად განხორციელება მოხდეს“.
„მნიშვნელოვანია უკრაინელი ჯარისკაცების გაძლიერება. თუ რუსეთის ამ თავდასხმებს წინააღმდეგობას 100%-იანი ეფექტურობით გავუწევთ, მაშინ პუტინის ტერორი აზრს დაკარგავს. ამ ეტაპზე ეს მათი უპირატესობაა და ჩვენ ეს შესაძლებლობა უნდა წავართვათ“, – აცხადებს ზელენსკი.