ეს არის ფეოდალური ხუშტური, სულთანმა გადაწყვიტა, ვიღაცაზე ეჭვი აქვს და დასაჯა, სამაგალითოდ, რათა დანარჩენებმა იცოდნენ, რომ ნებისმიერი შეიძლება სასჯელის სამიზნე გახდეს, – ასე აფასებს პოლიტიკოსი, დიმიტრი ცქიტიშვილი ყოფილი პრემიერის, ირაკლი ღარიბაშვილის დაკავებას.
მისი თქმით, მას არ ჰგონია, რომ ღარიბაშვილმა ისეთი რამ გააკეთა, რაც ივანიშვილმა არ იცოდა.
მისივე თქმით, ივანიშვილმა გადაწყვიტა, რომ მას ფული მოჰპარეს, შეადგინა პირადი სასამართლო და დაავალა, რომ დაეჭირათ ის ადამიანი, ვინც უღალატა.
კონკრეტულმა ადამიანმა გადაწყვიტა, რომ მას ვიღაცამ უღალატა, მისი პირადი ფული მოიპარა, არა სახელმწიფოსი, მან თავისი პირადი სამართალი შეადგინა, და სასამართლოს, როგორც ნოტარიუსს დაავალა, რომ არა ერთ თვეში, არამედ ხვალვე ჩაენიშნათ სასამართლო და უბრალოდ დაეჭირათ ეს ადამიანი. ალბათ, ამაშიც რაღაც გარიგება მოხდა. აღიარება მაგალითად, სადაც ღარიბაშვილმა აღიარა, რომ შავი სალაროდან ფული მოიპარა, ამ აღიარებას მოჰყვა გადახდები და ასევე, მოჰყვა ისიც, რომ ამას სჭირდება ნება-ყოფლობითი სასჯელი, რომ წავიდეს ციხეში და ადვოკატი იძახის, რომ კაცურად მოიხდის სასჯელს. ეს არის მენტალიტეტი, რომელიც ახასიათებს ივანიშვილს, მოიხადა სასჯელი იმ გაგებით, რაც თვითონ დაავალა და გადაუწყვიტა ადამიანს, რომ ელიც ფორმალურად პოროკურატურამ და სასამართლომ გააფორმა. სწორედ ესაა ფეოდალიზმი, როდესაც ერთი ადამიანს შეუძლია თავისი პირადი კეთილდღეობისა და ინტერესებისთვის, დასაჯოს ნებისმიერი ადამიანი, მათ შორის საკუთარი გარემოცვიდან, სამაგალითოდ, რომ სხვებსაც ეშინოდეთ, – განაცხადა ცქიტიშვილმა.