საქართველოს პრეზიდენტი სალომე ზურაბიშვილი რუსეთის მიერ უკრაინის რეგიონების დონეცკისა და ლუგანსკის „დამოუკიდებელ რესპუბლიკებად“ აღიარებას გამოეხმაურა.
მისი თქმით, აღნიშნული გადაწყვეტილება, იმ სცენარის გამეორებაა, რასაც შედეგად საქართველოს ტერიტორიის 20 პროცენტის ოკუპაცია მოჰყვა.
„საქართველო მკაცრად გმობს რუსეთის მიერ უკრაინის დონეცკისა და ლუგანსკის რეგიონების „აღიარებას“, რაც არის იმ სცენარის გამეორება, რასაც შედეგად მოჰყვა ჩვენი ტერიტორიის 20 პროცენტის ოკუპაცია. საქართველო თქვენ გვერდით დგას პრეზიდენტო ზელენსკი და მხარს უჭერს უკრაინის ტერიტორიულ მთლიანობასა და მშვიდობას“, – წერს სალომე ზურაბიშვილი Twitter-ზე.
პრეზიდენტის განცხადებას ჟურნალისტი ვახო სანაია სოციალურ ქსელში ეხმაურება:
“ქალბატონო პრეზიდენტო, ბოდიში გაქვთ მოსახდელი საქართველოს წინაშე. სხვაგვარად თქვენს ამ სიტყვებს ჩალის ფასიც არა აქვს”, – წერს სანაია “ფეისბუქი”-ს პირად გვერდზე.
რუსეთმა დონეცკისა და ლუგანსკის ე.წ. სახალხო რესპუბლიკების დამოუკიდებლობა აღიარა. აღნიშნული გადაწყვეტილების შესახებ რუსეთის პრეზიდენტმა, ვლადიმერ პუტინმა უშიშროების საბჭოს სხდომის შემდეგ გაკეთებული მიმართვისას გამოაცხადა.