სურსათის ეროვნული სააგენტოს ზედამხედველობით, საქართველოში „Nestlé საქართველო“-ს მიერ წარმოებული ბავშვთა კვების გარკვეული პარტიების ბაზრიდან ამოღება მიმდინარეობს. ამის შესახებ ინფორმაციას სურსათის ეროვნული სააგენტო ავრცელებს.
გადაწყვეტილება „ნესტლე ჯგუფმა“ მას შემდეგ მიიღო, რაც გარე მომწოდებლისგან მიღებულ ნედლეულში – მცენარეულ ზეთში (ომეგა-6 არაქიდონმჟავების წყარო) ტოქსინ ცერეულიდის შესაძლო რისკი გამოვლინდა. სააგენტოს განმარტებით, აღნიშნული ინგრედიენტის შემცველობა მინიმალურია და ცერეულიდის შემცველობა არც საქართველოში და არც ევროკავშირის ქვეყნებში ნორმირებული არ არის.
ამ ეტაპზე ზედამხედველობა ხორციელდება NAN 1 OPTIPRO და NAN 2 OPTIPRO-ს კონკრეტული პარტიების გამოთხოვის პროცესზე (800 გ, 400 გ და 1050 გ შეფუთვები).
სურსათის ეროვნული სააგენტო და ჯანდაცვის სამინისტრო მომხმარებლებს მოუწოდებენ, თუ მათ შეძენილი აქვთ დასახელებული პარტიების პროდუქცია, არ გამოიყენონ იგი.
უწყებების განმარტებით, ღონისძიებები პრევენციული ხასიათისაა და ნივთიერება ჯანმრთელობისთვის მნიშვნელოვან რისკს არ წარმოადგენს. ცერეულიდი არის ღებინების გამომწვევი ტოქსინი, რომელიც შესაძლოა გამოიწვიოს ღებინება, დიარეა და სისუსტე, თუმცა სიმპტომები, როგორც წესი, 24 საათში ქრება.
ამ დროისთვის ევროპის ქვეყნებში ბავშვების ჰოსპიტალიზაციის არცერთი შემთხვევა არ დაფიქსირებულა. სიმპტომების გამოვლენის შემთხვევაში, რეკომენდებულია პედიატრთან კონსულტაცია.
სურსათის ეროვნული სააგენტოს ინფორმაციით, ბაზრიდან ამოღება ვრცელდება მხოლოდ კონკრეტულ პარტიებზე და არ ეხება „ნესტლეს“ სხვა პროდუქციას, რომელიც საქართველოში იყიდება. პარტიების იდენტიფიცირებისა და ამოღების პროცესი უწყვეტ რეჟიმში მიმდინარეობს.