საგანგაშო ვითარება გუდაურში – ზამთრის კურორტი სეზონს სრულად მოუმზადებელი შეხვდა.
საპარკინგე ადგილების დეფიციტის გამო, გუდაურში შესასვლელი ცენტრალური გზა პრაქტიკულად ჩახერგილია. მძიმე მდგომარეობაა შიდა გზებზეც – გადაადგილება ხშირი საცობების გამო უკიდურესად გართულებულია.
პრობლემებს ემატება ანტისანიტარიაც: ქუჩებსა და საერთო სივრცეებში ნაგავი ურნებთან სართულებადაა დაყრილი, რაც კურორტის იერსახეს და უსაფრთხოებას სერიოზულად აზიანებს.
სათხილამურო ტრასებზე დიდი რაოდენობით ქვებია, რაც საფრთხეს უქმნის დამსვენებლებისა და სრიალის მოყვარულების უსაფრთხოებას. ამასთან, საბაგიროების ნაწილი გამორთულია და არ ფუნქციონირებს.
ადგილობრივი ბიზნესის წარმომადგენლები აცხადებენ, რომ შექმნილი ვითარება კურორტის რეპუტაციას ზიანს აყენებს და სეზონის ჩავარდნის რეალური რისკი არსებობს. ისინი პასუხისმგებელი უწყებებისგან დაუყოვნებელ რეაგირებას ელოდებიან.
უკმაყოფილებას ვერ მალავენ ვერც დამსვენებლები.
მანქანების გარდა ფეხით გადაადგილაც ძალიან დიდი პრობლემაა, რადგან სუნთქავ ამ გამონაბოლქვს და საერთოდ არ აქვს აღქმა ადამიანს იმის, რომ მთაშია და ისვენებს. ერთი კვირაა აქ ვარ და ერთხელ ვნახე მხოლოდ ნაგვის მანქანა და გზებიც საშინელებაა. აღარ არის ბორდიური, რომ ადამიანმა იაროს, გვიწევს შუა ქუჩაზე სიარული, საფრთხის შემცველია, რა თქმა უნდა, მოყინულ გზაზე, – ამბობს დამსვენებელი.