დღეს რუსულმა მედიამ გაავრცელა ინფორმაცია, რომ აშშ-ის მიერ ატლანტის ოკეანეში დაკავებულ რუსულ ტანკერზე საქართველოს 6 მოქალაქეა, მათ შორის საქართველოს მოქალაქეა გემის კაპიტანიც. მათივე ცნობით, გემზე სულ 28 ადამიანი იმყოფება, მათ შორის 20 უკრაინელია, დარჩენილი 2 კი რუსეთის მოქალაქეა.
ამასთან დაკავშირებით საზღვაო სატრანსპორტო სააგენტო განცხადებას ავრცელებს და ამბობენ რომ ამჟამად ინფორმაციის გადამოწმების ეტაპზე არიან.
“ღია წყაროების მიხედვით, 2026 წლის 7 იანვარს აშშ-ის მიერ ატლანტის ოკეანეში დაკავებული ტანკერის „Marinera“ ეკიპაჟის შემადგენლობაში იმყოფება 28 მეზღვაური, მათ შორის 6 – საქართველოს მოქალაქე, რომელთაგან ერთ-ერთი, გავრცელებული ინფორმაციით, გემის კაპიტანია. ასევე, ეკიპაჟში არიან 20 უკრაინის და 2 რუსეთის ფედერაციის მოქალაქე.
არსებული ინფორმაციით, აღნიშნული ტანკერი დაკავებული იქნა აშშ-ის მიერ ვენესუელაზე დაწესებული საერთაშორისო სანქციების შესაძლო დარღვევის ბრალდებით.
სსიპ საზღვაო ტრანსპორტის სააგენტო ამჟამად ახორციელებს ფაქტობრივი გარემოებების დაზუსტებას, მათ შორის, გემის დამსაქმებელი კომპანიის იდენტიფიცირებას და ეკიპაჟის ქართველი წევრების შესახებ ინფორმაციის მოძიებას” – წერს საზღვაო ტრანსპორტის სააგენტო სოციალურ ქსელში.