ჟურნალისტი მერაბ მეტრეველი სოციალურ ქსელში წერს:
“ნეტავ, ყველა ხელისიფლება წელიწადში ერთხელ გარემოვაჭრეებს არ მიადგებოდეს, ხოლმე!
რა ვნებაა ასეთი?!
ვარკეთილის მეტროს აუშნოებენ, არა?! და ამიტომ გაწყვეტილან მშივრები!
ვახ, საიდან მოდიხართ ასეთი უგულოები!”, – წერს მეტრეველი “ფეისბუქი”-ს პირად გვერდზე.
თბილისის მერიის ინფორმაციით, გუშინ, 17 თებერვალს გვიან ღამით, მეტროსადგურ ვარკეთილის მიმდებარე ტერიტორიიდან გარემოვაჭრეების დახლები აიღეს. დღეს დილით კი ადგილზე მისულ მოქალაქეებს დახლების გაშლის უფლება აღარ მიეცათ.
მერიის განმარტებით, თბილისის მუნიციპალურმა ინსპექციამ და რაიონის გამგეობის წარმომადგენლებმა მოქალაქეები არაერთხელ გააფრთხილეს, რომ „გარევაჭრობა უკანონოდ ხორციელდებოდა, ტროტუარის დაკავების შედეგად, გადაადგილება ფერხდებოდა“, შესაბამისად, გარემოვაჭრეებს უნებართვო სამეწარმეო საქმიანობის შეეწყვიტა მოსთხოვეს.
„სამგორის გამგეობის წარმომადგენლების მუშაობის შედეგად, ბაზრობის დირექცია გარემოვაჭრეებს სპეციალურ პირობებს შესთავაზებს. კერძოდ, ისინი სამი თვის განმავლობაში, გათავისუფლდებიან საიჯარო გადასახადისგან, ხოლო შემდგომში საშეღავათო პირობებით ისარგებლებენ. სამგორის რაიონის გამგეობის ორგანიზებით, გარემოვაჭრეებსა და შპს „ვარკეთილი 96“-ის წარმომადგენლებს შორის შეხვედრებიც გაიმართა“,- ნათქვამია თბილისის მერიის ინფორმაციაში.
როგორც მოვაჭრეები მედიასთან საუბრისას აცხადებენ, ბაზრობის ტერიტორიაზე არსებული გადასახადი ხშირად აღემატება იმ შემოსავალს, რასაც გარევაჭრობით გამოიმუშავებენ, რის გამოც ბაზრობის ტერიტორიაზე შესვლაზე უარს ამბობენ.