პროევროპულ აქციებზე დაკავებული ვასილ კაძელაშვილი ციხიდან წერილს აქვეყენებს და წერს, რომ “2026 წელი საქართველოს გათავისუფლების წელი იქნება მოღალატე მთავრობისგან და რუსეთის კლანჭებისგან”
მინდა ყველა ქვეყნისთვის მებრძოლ და ღირსეულ ადამიანს მივულოცო ახალი წელი, უკანონო ტყვეობიდან. უპირველესად, დიდი მადლობა მინდა გადავუხადო იმ პატრიოტ და ჩვენი დედა-სამშობლოსთვის მებრძოლ ჟურნალისტებს, რომლებიც ბევრი წინააღმდეგობის, ძალადობის, გაზით მოწამვლისა და უსამართლობის წინააღმდეგ დღესაც იბრძვიან. განსაკუთრებით მინდა მივულოცო 2026 წელი “TV პირველსა” და “ფორმულას” თითოეულ ჟურნალისტს და თანამშრომელს.
ასევე, მინდა მადლობა გადავუხადო ყველა უკანონოდ დაკავებული პატიმრის ადვოკატებს, რომლებიც ჩვენ გვიცავენ და იბრძვიან დიდი უსამართლობის წინააღმდეგ.
მინდა გადავუხადო მადლობა ყველა იმ ადამიანს, რომლებიც მონაწილეობენ ამ პროტესტში, განსაკუთრებით კი ახალგაზრდებს, თქვენ ხართ ამ ქვეყნის ყველაზე ნათელი ვარსკვლავები და თქვენ უნდა იბრძოლოთ ბოლომდე, ეს ქვეყანა თქვენია და თქვენს ხელში უნდა განვითარდეს.
დარწმუნებული ვარ, რომ 2026 წელი საქართველოს გათავისუფლების წელი იქნება მოღალატე მთავრობისგან და რუსეთის კლანჭებისგან. ეს პროტესტია ყველაზე კარგი ადგილი, სადაც შეგიძლიათ გამოხატოთ ბრაზი და გულის ტკივილი იმ ქმედებების მიმართ, რასაც ეს მთავრობა აკეთებს, თუ როგორ კლავს და ანადგურებს საქართველოს, მაგრამ სანამ თქვენ მანდ ხართ, ჩვენი გამარჯვება გარდაუვალია.
დიდება საქართველოს.
დიდება უკრაინას.
დიდება გმირებს,” – წერს ვასილ კაძელაშვილი