ახალშობილის განზრახ მკვლელობის საქმეს, ქალთა უფლებადამცველი ბაია პატარაია სოციალურ ქსელში ეხმაურება:
“რა დგას დედის მიერ წვალებით ნამშობიარები ჩვილის მოკვლის უკან, გიფიქრიათ? აღმოჩნდა, რომ ბევრს, განსაკუთრებით კაცებს, არასდროს უფიქრია. იურისტებს კი გვასწავლიან თუ რა ჯოჯოხეთია პოსტსამშობიარო დეპრესია.
ფსიქიკურ ჯანმრთელობას სანამ სახელმწიფო ყურადღებას არ მიაქცევს, მანამდე ვიცხოვრებთ ამ ჯოჯოხეთურ ამბებში”, – წერს პატარაია “ფეისბუქი”-ს პირად გვერდზე.
ფოთის საქალაქო სასამართლომ, ახალშობილის განზრახ მკვლელობაში ბრალდებულ დედას პატიმრობა შეუფარდა.
სასამართლოზე დაცვის მხარემ ბრალდებულის გირაოს სანაცვლოდ გათავისუფლება მოითხოვა. მოსამართლე დავით გელაშვილმა დაცვის მხარის შუამდგომლობა არ გაიზიარა და ბრალდებულს პატიმრობა შეუფარდა.
„დამეხმარეთ, რომ ჩემს შვილთან დავბრუნდე”, – განაცხადა სასამართლო დარბაზში ბრალდებულმა, რომელსაც მცირეწლოვანი შვილი ჰყავს.
34 წლის ქალს გამოძიება ახალშობილის განზრახ მკვლელობას ედავება. პროკურატურის ინფორმაციით, დედამ განზრახ მოკვლის მიზნით ახალშობილი შვილი გაგუდა, შემდეგ კი საკანალიზაციო მილში მოათავსა. ბრალის დამტკიცების შემთხვევაში დაკავებულს 2-დან 5 წლამდე თავისუფლების აღკვეთა ემუქრება.
შეგახსენებთ, 14 თებერვალს ფოთში, დევნილთა დასახლებაში ჩვილის ცხედარი მას შემდეგ ნახეს, რაც საკანალიზაციო მილი გაიჭედა და დასახმარებლად ხელოსანი გამოიძახეს.
2,108 ნახვა
