ვენესუელას ლიდერის, ნიკოლას მადუროს დაკავება ენერგეტიკულ ბირჟებზე მკვეთრად აისახა, კერძოდ, ნავთობის ფასი ბოლო დღეების განმავლობაში საგრძნობლად შემცირდა.
ამ დროისთვის, ერთი ბარელის Brent-ის ღირებულება $60,25 დოლარამდეა შემცირებული, რაც დღის განმავლობაში თითქმის ერთ პროცენტიანი ვარდნაა, მთლიანი კვირის ჭრილში კი ფასის კლებამ 2,13% შეადგინა. დაახლოებით მსგავსი შედეგი აქვს WTI-საც, რომელიც ამჟამად $56,86 დოლარად ივაჭრება. დღის განმავლობაში კლება კი ასევე თითქმის ერთ პროცენტზეა. აღსანიშნავია, რომ გაცილებით მკვეთრი ვარდნა ფიქსირდება რუსული Urals-ის შემთხვევაში, რომლის ერთი ბარელის ფასიც დღის განმავლობაში 2.5%-ით არის შემცირებული და ამჟამად $49.22 დოლარად ივაჭრება. კვირის განმავლობაში კლებამ 4.63% შეადგინა.
ნავთობის ფასების მკვეთრი ვარდნა პირდაპირაა დაკავშირებული ვენესუელას პრეზიდენტის, ნიკოლას მადუროს დაკავებასთან. დადასტურებული ნავთობის მარაგებით უმდიდრესი ქვეყნის ლიდერის დაპატიმრების ფონზე არსებობდა ეჭვი, რომ ნავთობის ფასი აიწევდა, განსაკუთრებით, თუ სამხედრო მოქმედებები ფართომასშტაბიან კონფლიქტში გადაიზრდებოდა. თუმცა საკითხის სწრაფმა გადაწყვეტამ და შტატების პრეზიდენტის მიერ იმის დაანონსებამ, რომ ვენესუელაში ამერიკული ენერგო-გიგანტები აქტიურად დაბრუნდებიან ნავთობის ფასების კლების მოლოდინი გააჩინა. ენერგეტიკული სექტორის ექსპერტების შეფასებით, თუ Chevron-ი და Exxon-ი ვენესუელაში მართლაც დაიწყებენ მილიარდობით დოლარის ინვესტირებას და დაზიანებული ინფრასტრუქტურის აღდგენას, ეს ნავთობის ფასებს მთელი მსოფლიოს მასშტაბით მკვეთრად შეამცირებს.