ყოფილი გენერალური პროკურორის ოთარ რომანოვ-ფარცხალაძის მიმართ პროკურორმა საქართველოს მასშტაბით ძებნის შესახებ დადგენილება გამოიტანა.
შესაბამისი პროცედურების გავლის შემდეგ ყოფილ გენერალურ პროკურორზე უკვე საერთაშორისო ძებნა, ე.წ. წითელი ცირკულარით გამოცხადდება. ძებნის შესახებ დადგენილება პროკურორმა მას შემდეგ გამოიტანა, რაც ოთარ რომანოვ-ფარცხალაძეს აღკვეთის ღონისძიების სახით პატიმრობა შეეფარდა.
ყოფილი გენერალური პროკურორი რუსეთში იმყოფება. ის სწორედ აღნიშნული ქვეყნის მოქალაქეა.
ცნობისთვის, ოთარ რომანოვ-ფარცხალაძეს ბრალი ბიზნესმენ ლევან ჯანგველაძის მკვლელობის საქმეზე წარუდგინეს. კერძოდ კი, მას ბრალი საქართველოს სისხლის სამართლის კოდექსის 25/109-ე მუხლის ,,ნ“ ქვეპუნქტით წარედგინა, რაც შეკვეთით და ანგარებით განზრახ მკვლელობის ორგანიზებას გულისხმობს.
აღნიშნული დანაშაული სასჯელის სახედ და ზომად 16-დან 20-წლამდე ან უვადო თავისუფლების აღკვეთას ითვალისწინებს.
ბიზნესმენ ლევან ჯანგველაძის შეკვეთითა და ანგარებით, განზრახ მკვლელობისთვის მსჯავრდებულია გელა უძილაური. მას უვადო თავისუფლების აღკვეთა აქვს მისჯილი. აღნიშნული საქმის ფარგლებში ცალკე წარმოებად მიმდინარეობს რამდენიმე პირის საქმე, რომლის ფარგლებშიც დაკავებული არიან გიორგი მიქაძე, მამუკა ბაღდავაძე, გიორგი კაჭკაჭაშვილი და სანდრო წივწივაძე. გარდა ფარცხალაძისა, ძებნა არის გამოცხადებული დავით მიქაძისა და გიორგი ჯოხაძის მიმართ.