ტელეწამყვანი მაკა რაზმაძე სოციალურ ქსელში პოლიტიკოსის თამაზ მეჭიაურის გარდაცვალებას ეხმაურება:
“სადაც გადაცემა მქონდა ყველგან ერთ-ერთი უსაყვარლესი რესპონდენტი იყო ჩემთვის. ისე ინება განგებამ მისი ბოლო ეთერიც ჩემთან აღმოჩნდა… მე თვითონაც კოვიდით ვარ ახლა ინფიცირებული და დღეს მთელი დღე ხმა ვერ გავიღე… ვერავის მივუსამძიმრე და სიტყვა ვერ დავწერე… მაინც ბოლო წუთამდე მჯეროდა… ძალიან ადრე იყო ჯერ სიკვდილისთვის, ძალიან ადრე…
ვუსამძიმრებ ყველას ძალიან მაგარი კაცის წასვლას…
ნათელში იყავით ბატონო თამაზ, მაგარო ადამიანო”, – წერს რაზმაძე “ფეისბუქი”-ს პირად გვერდზე.
თიანეთის ყოფილი მერი და ყოფილი დეპუტატი, თამაზ მეჭიაური 67 წლის ასაკში, გუშინ დილით გარდაიცვალა.
თამაზ მეჭიაურს რამდენიმე კვირის წინ კორონავირუსი დაუდასტურდა.
საუნივერსიტეტო კლინიკის კლინიკური დირექტორის ლალი ტურძილაძის ცნობით, თამაზ მეჭიაურს სუნთქვის მწვავე უკმარისობა აღენიშნებოდა.
თამაზ მეჭიაური 1954 წლის პირველ დეკემბერს სოფელ ჟებოტაში დაიბადა. დაამთავრა თბილისის კომაროვის სახელობის ფიზიკა-მათემატიკური სკოლა-ინტერნატი, შემდეგ თბილისის სახელმწიფო უნივერსიტეტის საინჟინრო-ეკონომიკური ფაკულტეტი.
2012–2016 წლებში იყო საქართველოს მე-8 მოწვევის პარლამენტის წევრი, საფინანსო-საბიუჯეტო კომიტეტის თავმჯდომარე. 2016 წელს დააფუძნა პარტია „ერთიანი საქართველოსთვის“. 2017 წელს აირჩიეს თიანეთის მუნიციპალიტეტის მერად. 2020 წელს საპარლამენტო არჩევნებში მონაწილეობის მიზეზით თანამდებობიდან გადადგა.
https://mix.metronome.ge/25854-2/