ცხინვალის საოკუპაციო რეჟიმმა დაკავებული აქტივისტის, თამარ მეარაყიშვილისა და მისი მშობლების სახლი გაჩხრიკა. ინფორმაციას დემოკრატიის კვლევის ინსტიტუტის დამფუძნებელი, უჩა ნანუაშვილი ავრცელებს.
“წაიღეს მისი პირადი ნივთები, მათ შორის, ისეთი ნივთები როგორიცაა, მის მიერ გაგზავნილი წერილების ასლები წლების განმავლობაში დე ფაქტო ხელისუფლების მისამართით სხვადასხვა პრობლემებთან დაკავშირებით, კომპაქტ-დისკები, რომელზეც იყო საოჯახო ფოტოები, ასევე წაიღეს ნიდერლანდების საელჩოს მიერ გადაცემული პრიზი, 2018 წელს, როდესაც თამარმა გაიმარჯვა კონკურსში ადამიანის უფლების ტიტა – ასე ჰქვია პრიზს, ძველი ვადაგასული ქართული ბანკის საბანკო ბარათები და სხვა ასეთი პირადი ნივთები. პრაქტიკულად, ეძებდნენ ყველაფერს, რაც შეიძლება ყოფილიყო ხელჩასაჭიდი გამოძიებისთვის. რამდენიმე საათის შემდეგ, მათ ასევე გააგრძელეს ჩხრეკა თამარის მშობლების სახლში. ადვოკატი აპირებს, რომ უახლოეს დღეებში გაასაჩივროს წინასწარი პატიმრობის შესახებ გადაწყვეტილება, მას ამისთვის 3-დღიანი ვადა აქვს, თუმცა მას ასევე გამომდინარე იქიდან, რომ საქმე ეხება ჯაშუშობას გაუთქმელობაზე აქვს ხელი მოწერილი და ის დეტალებზე ვერ საუბრობს. თამარის დაკავებიდან ორი დღის შემდეგ, ჩატარებული ჩხრეკა კიდევ ერთხელ მოწმობს იმას, რომ მათ არანაირი კონკრეტული მტკიცებულება თამარის წინააღმდეგ არ გააჩნდათ. სახელმწიფო ორგანოებს პრაქტიკულად, საკუთარი მოქალაქის უფლებები მითუმეტეს, ოკუპირებულ ტერიტორიაზე არ ადარდებთ. მითუმეტეს იქ, სადაც მოუწევთ რუსეთთან საუბარი და რუსეთისთვის მოთხოვნა კონკრეტული პირის გათავისუფლებასთან დაკავშირებით” – ამბობს დემოკრატიის კვლევის ინსტიტუტის დამფუძნებელი უჩა ნანუაშვილი TV პირველთან.
შეგახსენებთ, სამოქალაქო აქტივისტი, თამარ მეარაყიშვილი საოკუპაციო რეჟიმმა 23 დეკემბერს დააკავა – მას ჯაშუშობას ედავებიან. მის წინააღმდეგ საქმე რუსეთის ფედერაციის სისხლის სამართლის კოდექსის 276-ე მუხლით არის აღძრული, რაც ჯაშუშობას გულისხმობს და 10-დან 20 წლამდე პატიმრობას ითვალისწინებს.