მსახიობმა იოსებ ხვედელიძემ მიხეილ თუმანიშვილის კინომსახიობთა თეატრი დატოვა. ამის შესახებ სოციალურ ქსელში თავად წერს და მიზეზებს განმარტავს. როგორც მსახიობისგან ხდება ცნობილი, ბოლო წლების განმავლობაში, მისი შეხედულებების გამო, ერთგვარი “სასჯელი” დაუწესეს, რაც იმაში გამოიხატებოდა, რომ მოიხსნა ყველა ის სპექტაკლი, რომელშიც ის მონაწილეობდა. აღნიშნულს გაგრძელებაც მოჰყვა, იოსებ ხვედელიძეს ხელფასი ფაქტობრივად გაუნულდა და ამის დასტურად, “ფეისბუქი”-ს პირად გვერდზე ანაზღაურების ის ქვითარი გამოაქვეყნა, სადაც მითითებული სარგო მხოლოდ 7 ლარს შეადგენს.
როგორც მსახიობი აღნიშნავს, მისთვის ძალიან მტკივნეულია დეტალების ჩამოთვლა და დასძენს, რომ მის მიერ მიღებული გადაწყვეტილება იძულებითია.
“შეიძლება გადაჭარბებულია იმის იმედი, რომ ბოლო მსახიობი ვიქნები, რომელიც თეატრს იმ მიზეზით ტოვებს, რა მიზეზიც ჩემს შემთხვევაში გადამწყვეტი გახდა…
2017 წლის შემდეგ თეატრმა გარკვეული “სასჯელი”დამიწესა ჩემი შეხედულებების გამო. მოიხსნა ყველა ის სპექტაკლი, რაშიც ვიღებდი მონაწილეობას და ფაქტობრივად გამინულდა ხელფასი. ჩარიცხული თანხის ნაწილი იქვითებოდა ჯანმრთელობის დაზღვევაზე. წლების განმავლობაში დაზღვევის ფასის ზრდასთან ერთად, ხელზე ასაღები თანხის ოდენობა მცირდებოდა. განახლებული სადაზღვევო პოლისის შემდეგ კი, ,,დარჩენილმა,, თანხამ შეადგინა მხოლოდ – 7 ლარი. დიდი მადლობა თეატრს დაზღვევისთვის. ჩემგან დაუსწრებლად სავარაუდოდ ბევრი არგუმენტი გაჩნდა მათი ნაბიჯის გასამართლებლად. 5 წლის განმავლობაში თეატრს არცერთხელ გამოუთქვამს ჩემთან დიალოგის სურვილი. მხოლოდ მას შემდეგ გაჩნდა ეს სურვილი, რაც განცხადება დავწერე შრომითი ურთიერთობის შეწყვეტის შესახებ.
დიალოგის რესურსს ნამდვილად ვერ ვხედავდი არსებული უსამართლობის გამო და უარი ვთქვი ამ შეხვედრაზე. მოვითხოვე განცხადება შესაბამის დაფაზე განთავსებულიყო. ჩემი წასვლის ნამდვილი მიზეზი მინდოდა გაეგოთ ჩემ კოლეგებს, რა თქმა უნდა, ასე არ მოხდა. ამიტომ გიზიარებთ ჩემს განცხადებას. ცხადია, აქ არ დასრულდება ამ თემაზე მსჯელობა და ყოველთვის მოძებნიან თავის გასამართლებლად არგუმენტებს.
ძალიან მტკივნეული და უიმედოა ამ სამარცხვინო დეტალების ჩამოთვლა. შესაბამისად, თავს აღარ შეგაწყენთ. ვუსურვებ ყველას წარმატებას. დიდი მადლობა ჩემს მეგობრებს და კოლეგებს ერთად გატარებული წლებისთვის. იმედია, სწორად გაიგებთ ამ იძულებითი გადაწყვეტილების მიზეზს”, – წერს იოსებ ხვედელიძე სოციალურ ქსელში.
