მოსამართლე დალი მეტრეველი გარდაიცვალა. იგი ბოლო წლებში მძიმე სენს ებრძოდა. სამწუხარო ინფორმაციას “საქართველოსთვის” ერთ-ერთი ლიდერი ნათია მეზვრიშვილი ეხმაურება და მოსამართლეს ემოციურ წერილს უძღვნის:
“ოჰ, თქვენო ღირსებავ, Dali Metreveli როგორ ძალიან ჩამწყვიტეთ გული. დედოფალო-თქო ვიტყოდი, მაგრამ ვერ გკადრებთ, ჩემთვის სულ „თქვენო ღირსება“-დ დარჩებით.
გავბედავ და საჯაროდ ვიტყვი: დღემდე თვალებიდან არ ამომდის სათათბირო ოთახში გასული ატირებული მოსამართლე… ამხელა და ამდენი განსხვავებული ადამიანის სიყვარულის მოპოვებას თქვენ თუ შეძლებდით.
უღრმესი პატივისცემით, სტაჟიორი”, – წერს ნათია მეზვრიშვილი “ფეისბუქი”-ს პირად გვერდზე.
დალი მეტრეველი არაერთი გახმაურებული საქმის მოსამართლე გახლდათ. იგი ე.წ. კარტოგრაფების საქმის მოსამართლეც იყო, თუმცა, მძიმე სენთან ბრძოლის გამო, საქმის გაძღოლა ვეღა შეძლო.
2000-2003 წლებში დალი მეტრეველი საქართველოს შსს საგამოძიებო დეპარტამენტში გამომძიებლის თანამდებობას იკავებდა. 2003-2006 წლებში გაგრის საქალაქო სასამართლოს მოსამართლე იყო.
2006-2016 წლებში თბილისის საქალაქო სასამართლოს სისხლის სამართლის საქმეთა კოლეგიის მოსამართლე გახლდათ.
2017 წლის მაისიდან არის თბილისის საქალაქო სასამართლოს საგამოძიებო და წინასასამართლო სხდომის კოლეგიის მოსამართლე.
2019 წლის ოქტომბრიდან თანამდებობაზე გამწესებულია უვადოდ, კანონით დადგენილი ასაკის მიღწევამდე.
https://mix.metronome.ge/25824-2/