თამარ მეარაყიშვილის მეგობარი ნინო დალაქიშვილი შიშობს, რომ ახალგორელი აქტივისტის სიცოცხლეს დე ფაქტო რეჟიმის საპატიმროში შესაძლოა, საფრთხე შეექმნას. ჟურნალისტი საქართველოს ხელისუფლებას მოუწოდებს, საქმე საერთაშორისო დონეზე გაახმოვანოს და საქართველოს მოქალაქის გათაისუფლება მოითხოვოს.
მე დარწმუნებული ვარ აბსოლუტურად იმაში, რომ თამარას სიცოცხლის რისკის წინაშე დგას დღეს საზოგადოება. ამის თქმა იქიდან გამომდინარე შეგვიძლია, რომ გვაქვს ჩვენ გამოცდილება ამის, ვნახეთ ჩვენ არაერთხელ, რომ რეჟიმი კლავს და ვნახეთ საპატიმროებში მიყვანილი ადამიანები, რომლებიც იქიდან სამწუხაროდ, ცოცხლები ვერ გამოვიდნენ და ვერ დაგვიბრუნდნენ. საქართველოს მოქალაქეებზე მაქვს საუბარი, ცხადია. ერთადერთი მიზანი მის დაკავებას აქვს, უბრალოდ, თამარას გაჩუმება. მისი საუბრის, მისი აქტიურობის ეშინია ყველას, ეშინია დე ფაქტო ცხინვალსაც და არა მარტო ეშინია, არამედ ძალიან აწუხებს.
რა შეიძლება, იქცეს ბიძგად იმისთვის, რომ თამარის გათავისუფლება მოხერხდეს. ერთადერთი ბიძგი შეიძლება, იყოს საქართველოს ხელისუფლების ძალიან დიდი ააქტიურობა საერთაშორისო დონზე, – ამბობს ნინო დალაქიშვილი.
შეგახსენებთ, ოკუპირებულ ცხინვალში ახალგორელი სამოქალაქო აქტივისტი თამარ მეარაყიშვილი უშინ დააკავეს. მას ორთვიანი წინასწარი პატიმრობა უკვე შეეფარდა. დე ფაქტო რეჟიმი აქტივიტს „ჯაშუშობას“ ედავება, რაც 20 წლამდე პატიმრობას ითვალისწინებს.
დაკავებამდე ერთი დღით ადრე მეარაყიშვილმა ვიდეომიმართვა გაავრცელა, სადაც საუბრობდა უფლებების სისტემურ შეზღუდვებზე და დე ფაქტო ხელისუფლების შიდა პრობლემებზე. უფლებადამცველების ინფორმაციით, დაკავებული აქტივისტი პროტესტის ნიშნად საკვების მიღებაზე უარს აცხადებს.
მეარაყიშვილი წარსულშიც არაერთხელ ყოფილა დაკავებული, თუმცა წინა ბრალდებები 2023 წელს მტკიცებულებების არარსებობის გამო მოიხსნა.